E le gata ina ofo atu e le malo o Samoa manupapalagi, e 10 mo Amerika Samoa, lima povi ma mamoe e lima, ae ua valaaulia ai foi e Samoa, Amerika Samoa i ana fuafuaga o iai nei mo le faatupuina o manu papalagi e ala ile aumaia lea o suaola o povi po’a tetele mai Ausetalia, e faafailele i Samoa.
O lena lava fuafuaga mole faatupuina o lafumanu I Samoa, o loo faamaonia mai foi e le ofisa o faatoaga a Samoa, le faaauau ai o feutanaiga ma au fai lafu povi I Ausetalia, le aumaia lea o tama’i povi mo le faamoemoe maualuga lava e tasi ole lava o taumafa.
Ile pepa o faamatalaga faalauaitele mai le Matagaluega o Faatoaga ma Faigafaiva a Samoa, o ta’ua ai e le Ofisa sili ole Matagaluega, Dr. Seuseu Tauati, lo latou valaaulia ai lea o Amerika Samoa, i faatalanoaga o fuafuaga pei ona ta’ua I luga, ma se faiga e faafaigofie ai ona galulue faatasi Samoa e lua ile aumaia faatasi lea o a la tama’i fagafao povi ise vaa sami.
Ma faafetaia ai e le Pulega o faatoaga ma faigafaiva a Samoa le malo I Sasa’e ile lagolago mai ae ole galuega faifaatasi, a lana Marine and Wildlife Resources ma lana Ofisa o Faatoaga.
O ta’ua foi e le ofisa sili, Dr. Seuseu, ole galulue faatasi ma Amerika Samoa, o le a tele sona sao i atina’e o taumafai nei i itu tau I faatoaga, ma faigafaiva ile tatou itulagi. Ma ia faamalo ai, i a’i latou uma lava o iai le agaga ole galulue faatasi e faaleleia atili atina’e tau faatoaga, ma faigafaiva, i Samoa.
I tatou sailiga lava ile mataupu lea, na tatou fesiligia ai le Susuga Solia Mutini o le ofisa sili o le matagaluega o faatoaga a Amerika Samoa, I lana tali mai, “e le mafai ona ia pelogia afioga ile maota o le Senate I Amerika Samoa, aua o mataupu na talanoa iai, sa faatalanoaina i Samoa, o tapenaga uma na mo le Atoa o Samoa oi luma.”
Peita’i ole tali foi lena mai le Afioga ile Minisita o Faatoaga ma faigafaiva, a Samoa, Susuga Laaulialemalietoa, ina ua tatou fesilgia.
“O tapenapenaga na mo sona faamaoniga ile taimi o lesi fono ale Atoa o Samoa.”
E ui ina teena e ta’ita’i ole malo o Samoa, e aofia ai le Palemia, ole Minisita o Faatoaga, i le taimi o lana fono faapalemene, ae ole Sui Palemia ina ua tatou fesiliga, le iai oni vaega eleele ua ofo atu mo le pa manu a Amerika Samoa, peita’i o lea ua faailoa mai e le Ofisa sili o le Matagaluega o Faatoaga ma faigafaiva a Samoa, Dr. Seuseu Tauati, “o Samoa na valaauliaina Amerika Samoa, ile amataga ia faia faatasi faatalanoaga mole atinaeina o lafumanu papalagi, e oo lava ile aumaia o sua ola e faafailele i Samoa, ma le aumaia o tama’ipovi mai Ausetalia ise vaa sami.”
I a tatou sailiga lava, o maua ai, o mataupu tau i eleele mo se lafumanu a Amerika Samoa, o vaega uma na ole faatalatalanoaga fai faatasi ma tapenaga mo lesi fono a le Atoa o Samoa oi luma.
