Mai le toavalu o matai lagolago a le HRPP, poo le vaega faapufai e puipuia aia tatau a tagata, na molia i lo latou faalemigao poo le vaai maulalo ile faamasinoga a Samoa, E na’o le toa tolu ua faamaonia solitulafono.
E aofia ai le latou taitai: ole faipule ole itumalo o Lepa, ole sa avea mai Palemia i le faitau tausaga ua mavae, Tuilaepa Sailele Malielegaoi, Failautusi ale HRPP, ole faipule o Faleata 3:Lealailepule Rimoni Aiafi, ma le loia sinia ole Sosaiete Loia a Samoa, ia Maiava Visekota Peteru.
E toalua Faamasino papalagi mai Niusila sa faia le faamasinoga lenei, Justice Fisher ma Justice Asher. Na valaau faaalauaitele ai le fofogaina o folasaga a loia ile aso 28 o Fepuari ma aumai ai lana faaiuga i le vaiaso nei, Aso Lulu 23 o Mati 2022.
O faamanino mai ile faaiuga, le teena e faamasino ole faataatia ese ole mataupu lea, mose filemu o Samoa.
Peita’i ole manoga o Samoa e aofia ai le toe aumaia lea i luga o ana tulafono. Pei ona ta’ua e le Loia sili o iai nei, i lana pepa o faamaumauga: Afai e taliaina e le faamasinoga molimau na tuuina atu e le itu tagi, o molimau na e lagolagoa le moliaga ole vaaimaulalo ile faamasinoga. O le ituaiga soligatulafono lena e iai ona aafiga ogaoga i tulafono a Samoa.
O ta’ua foi e famasino nei e to’alua, afai e le faia se faatatau ile solitulafono lea ole vaai maulalo ile faamasinoga, ole ‘a afaina ai le malosiaga o le tulafono ile agai i luma. A le faamuta le ituaiga amioga lea, ose aafiaga foi lena o Samoa.
I le palakalafa 21 o le faauiga, o taua ai e faamasino, lo la amanaia ole taumafaiga a vaega faaupufai e faauma le latou va. Ae, peita’i. e leai so latou malosiaga e faamuta ai taualumaga a le faamasinoga i luga ole soligatulafono ole vaaimaulalo i le faamasinoga.
Ole faamasinoga lea na fai, e lei faatatau ile feeseeseaiga a le FAST ma le HRPP poo tagata o loo lagolagoa.
O taualumaga ole faamasinoga, sa faatatau ile tulaga o le faamasinoga ma le tulafono. Ole le mautonu ile tulafono ma faafeto’aiga faasaga iai, ua ose faafitauli o Samoa, ua mana’omia ai lava ona fai sona faaiuga ma faamuta loa lava ise taimi vave. Peita’i ua toe vaiaso ma nai aso valaau le faamasinoga, ae faatoa avane le maliega faafilemu a vaega faapufai, poo le Harmony Agreement. O lena maliega e lei talia e le faamasinoga.
Peita’i na amanaia e Faamasino finagalo faaalia na avatu ai o le Palemia filifliia ma le vaega faaupufai a le FAST, o se lagona e faataatia ese nei feeseseaiga ole palota. Ina ia maua ai e Samoa se avanoa e toe omai faatasi ai e taula’i i lu’itau o agai mai, pei o aafiga ile faamai tele ole koviti ma suiga ole tau. Na maitauina foi e faamasino le mananao uma lava o itu e lua e faataatia ese le mataupu lenei mai le faamasinoga.
Peita’i ile faaiuga a Faamasino, ana faapea late taliaina le maliega faafilemu lea na avatu e faamuta ai le faamasinoga lenei, o lona uiga o le’a tuu atu ai lava ma le itu tetee e leai se faasalaga. Ma fai ai le faaiuga faapitoa, e leai ni faasalaga faalefaamasinoga , ae faamaonia moliaga faasolitulafono ole vaai maulalo ile faamasinoga, ole taitai ole HRPP, o lana failautusi ma le tamaitai Loia.
Ole ofisa loia a le Latu Law, Taulapapa Brenda ma George Latu, ma le alii loia Mr Keith na tula’i mo le FAST ma le afioga i le Palemia Fiame Naomi Mataafa
