Ua fa’amaonia mai e le Matāgaluega o le Soifua Mālōlōina, e 267 i latou fou ua a’afia i le siama o le Koviti – 19 ae to’aono (06) i latou o lo’o taofia i nofoaga fa’apitoa i le Maota Gasegase i Moto’otua mai le 2:00 i le aoauli o le Aso 04 Me 2022 i le 2:00 i le aoauli o le Aso 06 Me 2022.
I LATOU UA MĀLILIU ONA O LE KOVITI – 19
Ua fa’amaonia fo’i e le Matāgaluega o le Soifua Mālōlōina e to’alua i lāua fou ua māliliu ona o āuga o le Koviti – 19 ma ua si’itia ai i le to’a 22 i latou ua māliliu talu ona pepesi i tua le fa’ama’i.
O i lāua ua māliliu;
1) O se taule’ale’a 36 tausaga e le’i ni ona ma’i tumau ma e leai ma sona tui o le Koviti – 19 ua faia.
2) O se tinā 94 tausaga e leai ni ona gasegase tumau ma e le’i faia fo’i ni ona tui puipui o le Koviti – 19.
O talosaga, fa’amaisega ma fa’amafanafanaga e lē aunoa mo nai ‘āiga ma fanau pele o i latou ua māliliu. O le fa’aaloalogia ma le amana’ia o tau ‘āiga o e ua māliliu, o le a leai ai se isi fa’amatagala fa’aopoopo e tu’uin atu mai lo tatou Mālō.
E fautuaina pea le mamalu lautele o le atunu’u ina ia aga’i e faia tui puipui o le Koviti – 19 auā na’o le pau lea o le puipuiga sili mo i tatou e tete’e atu ai i le Koviti – 19.
Ia fa’amuamua le puipuiga o si o tatou o tatou ‘āiga ma i latou e pele iā i tatou. Fa’amolemole nonofo lelei i fale ma vaai se nofoaga fa’apitoa o le fale e fa’anofoesea ai pe afai ua masalomia ua a’afia i ni āuga o le fa’ama’i.
E fautuaina le faia o tali fofoga i taimi uma ma ia tausisia le tutū ma le nofo vāvā mo le lua mita mai le isi tagata aemaise i nofoaga faitele.
