E ono masina e nofovaavaaia ai ma le 60 itula e faigaluega ai e aunoa ma se totogi, le faasalaga ua tuuina atu nei e le afioga ia Alalatoa Rosella Papalii mo le susuga i le faafeagaiga Metotisi 68 tausaga ia Poasa Leaupepe.
Ina ua faamaonia e le Faamasinoga Faaitumalo moliaga o le faaoolima ua afua ai le maliu o le talavou 16 tausaga mai le afioga o Safotu i le Aso 28 o Fepuari.
O le mataupu lenei na tulai mai i le Aso 4 o Fepuari 2020 ao tausi nuu ai Poasa i le afioaga o Safotu i le Ekalesia Metotisi, e faapea na faaolima le ua molia i le ua maliu i le aso 4 o Fepuari ae faatoa maliu i le aso 28 o le masina lava lea.
Peitai na tuuese e le faamasinoga moliaga o le fasioti tagata paivalea ma le faaoolima tuga, ina ua maea ane suesuega a le fomai suesue ma faailoa mai le ripoti o le ua maliu poo Sootaga Viliamu e maua i le Kanesa o le toto, ma o le mafuaaga foi lea o le maliu.
Ma talosaga ai loa le loia o loo tulai mo Poasa i le faamasinoga, ina ia faapafala le faasalaga e aunoa ma le faamonia o le solitulafono, ae talosga le itu a leoleo e faamaonia moliaga ae faapafala se faasalaga
Peitai na matuai teena e le tamaitai faamasino ia Alalatoa Rosella Papalii nei talosaga ae tuuina ai loa le faasalaga 6 masina e nofo vaavaaia ai ma le 60 itula e galue ai e aunoa ma se taui.
