Ua le masino tala ave o le maliu ole alii aoga NUS Tuuau Maletino. Ina ua savali ile tolu tausaga o talia se taunuuga ole suesuega a leoleo, ma fai faalauaitele ai loa e tagata le faamasinoga i luga o fesootaiga televave ma ofisa faasalalau.
Ma o loo toso lava lena faamasinoga faalauaitele , i le taimi nei i luga o FB, ae leai lava se tala mai le malo, vagana ai le faapea mai , o loo faia le suesuega a le Loia sili ile faila o le sueseuga a leoleo.
Peita’i o lea maona ane nei i luga le molia ai e leoleo o lesi leoleo sinina ia Li’o.
Pei foi ona molimau mai e le Afioga ile Minisita o Faatoaga ma Faigafaiva ise faatalanoaga faalauaitele a Asiata ma Laaulialemalietoa Polataivao Leuatea Fossie Schmidt.
O loo mautinoa lava le mafuaaga na savali ese ai le susuga a Laauli ma le faigamalo a le HRPP, ona ole sailia ole amiotonu, ma toe foi ane lava ile palemene , faatu le vaega faaupufai a le FAST na taulamua ai.
Peita’i, o loo atagia i ana saunoaga ile faatalanoaga lea ma Asiata , e iai se isi foi ‘olo malosi, ua la fesaga’i nei , mai le pulega a le FAST,
Ua folafola ai e Laauli, “e le fou lea tulaga ia te ia, ma ole a talitali pea.”
Peita’i, ole faatuatuaga na ave ile leoleo na faia suesuega o le maliu o Tuuau, ma molia ai nei ona o le auala na faatino ai lana suesuega,
Na saunoa ai Laauli, ole mataupu lenei, o lea a fanau mai ai se mea lelei mo le matagaluega o leoleo.
Ma e le fou foi le tapisa ole atunuu, i faiga faaalatua o tutupu i totonu ole ofisa o leoleo mai lava pulega ua tuanai, e oo mai nei lava o tala laumanu’ia lava na poo lu’itau o feagai pea ma le pulega o le matagaluega o leoleo.
Pei foi ona faatonuina ai le Minisita o leoleo afioga a Lefau Harry Schuster, e faasee ese ma le sueseuga ole Mataupu lea ile maliu o Tuuau, ae ua silia ile lua tausaga mulimuli ane talu ona to’alia le suesuega a leoleo, se ia oo mai nei ile faamasinoga faalaaitele lea ua faia e tagata lautele i luga o fb.
