I le lipoti a le Matāgaluega o le Soifua Mālōlōina mo lenei fitu aso (tasi le vaiaso) ua fa’amauina ai e 1,006 le mamalu lautele o le atunu’u ua pesia i le siama o le Koviti – 19 mai le 2:00 i le aoauli o le Aso 08 Me 2022 se’ia o’o mai i le Aso 15 Me 2022 i le itula e 2:00 i le aoauli. Ma ua si’itia ai i le 11,973 i latou ua a’afia i totonu o le atunu’u.
O le to’atele oi latou nei o lo’o aumau i Upolu e 10,318 soso’o ai ma Salāfai e 1,639 e ua a’afia ma le to’a 16 mai le motu o Manono – Tai. Ua si’itia nei i le 78 i latou ua a’afia sa malaga mai fafo e aofia ai ma le to’alua (2) fou ua fa’amauina ua a’afia ile siama.
E to’alima (5) gasegase o lo’o taofia i le Falema’i i Moto’otua, ae le’o i ai se tasi o i le Potu Tigāina.
E fautuaina pea le mamalu o le atunu’u ina ia tausisia fautuaga fa’alesoifua mālōlōina o lo’o aiaia atu i le Poloā’iga o Fa’alavelave Fa’afuase’i e ala i le faia o tali fofoga i taimi uma, tausisia le nofo ma le tutū vāvā mo le lua mita mai le isi tagata. Afai ua masalomia lou a’afia i āuga o le fa’ama’i, fa’amolemole nofo lelei i le fale, fa’anofoesea i se vaega fa’apitoa o lou fale, ina ia puipuia mai ai lou ‘āiga ma e pele iā te oe i le ono pesia ai i le siama.
I le taimi nei, o lo’o fa’aauau pea tuiga i Moto’otua ma falema’i uma fa’aitumālō i totonu o le atunu’u. Mo i latou e le’i mae’a tui puipui o le Koviti – 19, tui muamua, tui lona lua ma le tui fa’aopoopo fa’amolemole ia vave aga’i e fa’atino lou tui auā ua mautinoa e na’o le pau lea o le puipuiga sili mo le lalolagi atoa e tete’e atu ai i lenei fa’ama’i mata’utia.
I LATOU UA MĀLILIU I LE KOVITI – 19
E pei ona lipotia atu i le amataga o le vaiaso ua mavae, i totonu o lenei fitu aso ua fa’amauina ai e to’atasi (1) le maliu fou ona o āuga o le Koviti – 19, o le ua maliu o se tinā 59 tausaga o le soifua e i ai ona gasegase tumau ma e le’i faia lava sona tui puipui o le Koviti – 19. Ma ua si’itia ai i le 24 e ua māliliu ona o le fa’ama’i.
I le fa’aaloalogia ma le amanaia o ‘āiga o e ua māliliu, o le a leai ai se isi fa’amatalaga fa’aopoopo e tu’uina atu mai lo tatou Mālō.
