O loo auaua’i mai lava mealofa a le malo o Niusila ia Samoa ile tausaga lenei ua faamanatu ma atoa iai le 60 tausaga o le la Uo Mamae.
Pei ona faalauiloa aloaia ai ile Aso Tofi, 11 Aukuso, le masini faapitoa mo malaevaalele e iloa ai le tagata malaga, Airport Identfication Card System. E ala i lana Pacific Security Fund poo ana tupe faapitoa mo galuega tau ile puipuiga o le Pasefika.
Ma saunoa faapitoa ai le afioga i le Minisita o Malaevaalele, Olo Afoa Fiti Vaai, e faafetai ile malo o Niusila, i lona amanaia o le puipuiga o malo o le Pasefika,
Mai le iva atunuu o le tatou itulagi, ua atofa iai le fesoasoani lenei a Niusila, ae ua tamua mai ia Samoa , e tusa le tau ma le 50afe tala.
Saunoa le Minisita i le taua o le masini lenei i tapenaga a le pulega o le Malaevaalele ina ia faamalieina aiaiga ole saogalemu ma le puipuia o Samoa mai tagata feoai faasolitulafono.
O lesi mealofa lea ua agia e fesoasoani mai ai foi le malo o Niusila, ose masini faitau miliona tala lona tau, e faata ai uta taunuu ile malaevaalele. E oo atu ile taimi lenei ole tausaga fou ua taunuu mai foi.
O le a fetaui foi ma tapenaga a Samoa i itu tau ile puipuiga i le fono a taitai a malo ole Taupulega e talimalo ai Samoa i le 2024.
Ma saga faafetaia ai pea e le malo o Samoa le fesoasoani a le malo o Niusila, ia Samoa ma le Pasefika. ae o le faaaua ai pea o le agaga faamoemoeina ole la Uo Mamae.
