7 Ianuari 2025 Samoa: Ua amata ai nei ona sailiili se faiaoga ulu o le Manu Samoa.
Ina ua talia atoatoa e le pulega o le Lakapi Samoa le faamavaega aloaia a le alii na fai ma faiaoga ulu ole au lakapi a Samoa le Manu Samoa le afioga a Mase Mahonry Schwalger.
Mai le itulau a le pulega o le Lakapi Samoa, o faalauiloa ai mai ananafi, o le faamavaega a Mase ile aso 6 Ianuari , na talia ai lava ile taimi lena e le fono faatonu o le Lakapi Samoa.
E faamavae ane Mase ile tofiga, ao faamalolo le tumau ai e le pulega, talu tuuaiga faasolitulafono o loo molia ai.
Peita’i o loo faamauina pea le siitia o taaloga a le Manu Samoa, i lalo ole taitaiga a le Susuga a Mase ile tausaga talu ai.
Pei ole manumalo ai a le Manu i lona malae ile la taaloga ma Italia, ma le tulaga na iai i taaloga o le ipu a le Pasefika.
Ma molimauina e le taitaifono, Tuilaepa Sailele Malielegaoi, le maoae foi o le sao o le Susuga a Mase ile au a le Manu Samoa, ae o le atinaeina ole taaloga. Ma avatu iai lana faamanuia i isi laasaga ole soifua galue.
Ma o le’a amata ai foi ona saili se isi faoaoga ulu ole au, mo le faauaua ai o le tulaga maualuga o le au lakapi a Samoa, le Manu Samoa i lona tulaga faavaomalo.
