Ua taatia atu ai i le falemaliu o le Tupua Tamasese Meaole, TTM i Motootua , toega poo ivi na maua ma avane i leoleo.
Na saunoa le Komesina o Leoleo , ina ua tatou fesiligia, Auapaau Logoitino Filipo: “ua taatia atu ile falemaliu, e talia ai le taimi o suesuega faapitoa a le fomai, o maliu lilo mai Fiti mo nisi suesuega.”
Ae o le tagata lea ile faamatalaga a le Komesina , na logo ane ai leoleo ile masina talu ai mai Toamua.
Ma ua taula’i atu a suesuega a leoleo i Toamua , ile vaega na maua ane ai ponaivi.
Mai lena taimi, ile masina talu ai, e oo mai nei, e leai se faailoga ua maua e leoleo e iloa ai poo se tamaitia poo se alii.
Ae se’i talia pea sailiga a le vaega suesue , faapena foi se taunuuga ose sailiga a le foma’i o maliu lilo.
E le tasi pe lua ni tagata matutua sa leiloloa ma sailia e leoleo, e oo mai nei e le’i maua lava.
I faamaumauga a leoleo, e iai foi le pagota na sola i tua, peita’I e le’i toe maua se tala mai na suesuega poo fea ua agai iai lena pagota ile taimi nei.
O isi maliu lilo e le’i maua lava foi tino, o le alii Ave taxi mai Solosolo ia Semi Le’au , o tuuaia e le tamaitai na la o ise fale tumatafaga i Safata, faapea na alu agai i le sami Semi, ma mou atu ai. Ae na alu sailiga a le nuu ma leoleo i vaega ole gataifale e masani ona to’a iai le au, e lei maua ai se tino.
O le mou faafuase’i o Semi Le’au na taofia ai i Samoa, lea tamaitai na la o ile fale tumatafaga, ae fai siliga a leoleo, peita’i na uma lava le taimi faatapulaa na taofia ai le tamaitai e lei manuia sailiga a leoleo ma toe foi atu ai lena tina i lona aiga i Ausetalia.
Ae toe fafoi ane mea totino a Semi i lona aiga I Solosolo e aofia ai ma lana taxi la’u pasese sa i lea tamaitai.
Peita’i o sailiga a leoleo i le au ivi na maua ane i Toamua, ile masina talu ai, o ta’ua e le Komesina , faato’a maua se isi faamatalaga ile auivi lea, pe’a uma su’esue’ga a le foma’i faapitoa, e oo mai nei o loo faatali mai mai Fiti.
