Na faato’a maliu i le falema’i i Leulumoega le pagota na faataalise ane iai e leoleo o le falepuipui i Tanumalala.
O le pagota lea ile saunoaga ale Komesina o leoleo Auapaau Logoitino Filipo na avane lava ile falemai i Leulumoega ile Aso Lua o le vaiaso nei o soifua ma ta’u atu e le falema’i e ogaoga sona aafiaga ae mulimuli ane maliu ai lava ile falema’i ile po o lea lava aso.
Na augata le afioga i le Komesina e faailoa le suafa o le ua maliu, ona faapea sei faatalanoa muamua ma le aiga, peita’i o molimau mai totonu, o Kolani Junior Lam. O ia lesi ole au fai togalaau aina i totonu lava o le lotoa, mo a latou lava taumafa i le falepuipui.
Na augata foi le Komesina e ta’u mai poo a meafaigaluega e faaaoga e pagota i le faatinoga o galuega faapea i fafo ina ua tatou fesiligia. Peita’i o masalomia ose vailaau fana vao ua fano ai lea foi soifua faafuase’i, ile suesuega a leoleo.
E maliu le tama ia Kolani o tuli lona faasalaga i moliaga o le fasioti tagata, e sootaga i le maliu o lona to’alua. Ole maliu faafuase’i o lona to’alua ia Oketopa 2018 na faate’ia ai foi le atunuu, talu ua tusa o le 8 tausaga o galue ai le afioga a Sa’u Christina Sa’u ma Ofisa sili o le UTOS Unit Trust of Samoa.
O le masina o Tesema 2019 na faamaonia ai ele Afioga i le Faamasino o le Faamasinoga Maualuga, Justice Tuatagaloa, le moliaga o le fasioti tagata o Kolani. Ma faamauina ose tasi o sauaga sili ona ogaoga ile atunuu aemaise sa tupu mai totonu ole lotoifale faaleaiga.
Peita’i sa tumau lava le tetee a Kolani ile faaiuga a le foma’i ile mafuaaga o le maliu o lona to’alua, ma sa ia toe talosaga ai lava e iloilo, ae togi mai i fafo e le Faamasinoga o Apili ile tausaga na te’a nei, Novema ole 2022.
I le feiloaiga a le vasega o Tusitala ma le Komesina o leoleo, Auapaau Logoitino Filipo ile Aso Lulu o le vaiaso nei, e uma ane lava le mataupu lea, na ia ta’ua o loo faia pea suesuega a leoleo ile mafuaaga ole maliu.
insert:
E faia le feiloaiga a le komesina ma Tusitala, pei ona ia saunoa, sei talanoa muamua ile aiga o le ua maliu ona faatoa augofie pe faigofie ai loa ona ia faamaonia mai, le suafa o le pagota ua maliu, ma le mafuaaga o le maliu, ae o a foi ituaiga o meafaigaluega e faaaoga e pagota i le faiga o togalaau, ae pe na faapefea foi ona sao atu le vailaau fana vao i le falepuipui.
