Ua valaau faalaua’itele ai e le alii faipisinisi mai Samatau Falelatai, Susuga a Pa’u Roy Ausage, avanoa faigaluega i Amerika Samoa, ile falei’a o le Starkist.
O na avanoa o loo ia faailoa i lana faasalalauga, e faia ile aso, ma taeao faatalanoaga, ile faletalimalo o le Seaview i Tauese.
Peita’i o saunoa le faipisinisi, Susuga a Pa’u, o le avanoa lava lea e oo atu ai ma fanau a lona itumalo, i Falelatai ma Samatau, sa avatu a latou pepa talosaga ia te ia, ina ia agai i le faatalatalanoaga faatasi ma pepa faamaonia (tusifolau, pepa fanau), kilia, ma pepa tui.
O avanoa faigaluega faavaitaimi i Amerika Samoa, pei ona iai, e fai e le kamupani a le Starkist pemita faigaluega, ma le avanoa faigaluega. Peita’i e saili lava le aiga ole tagata e nofo ai i Tutuila.
Ae na saunoa le afioga ile Palemia, Fiame Naomi Mataafa, ile fono a le Atoa o Samoa, e le’o tagata uma e iai aiga i le motu i Sasa’e.
Ma o lesi na itu o loo taga’i iai feutanaiga a malo e lua, ole faamautu o apitaga mo tagata faigaluega.
O faamanuiaga o galuega faavaitaimi i Tutuila, sa molimauina ele Teutupe a Amerika Samoa, i lana lipoti ole Atoa o Samoa talu ai nei, o Samoa, o loo tupe silia i tupe lafo i fafo, mai Amerika Samoa.
O isi mau o le faamanuiaga o na avanoa faigaluega, o le tumu ole uta a le vaa ole Lady Samoa i Aso Tofi o vaiaso taitasi, i uta, e le gata o pailate a pasese, ae o faamomoli a tagata faigaluega faavaitaimi nofomau i Tutuila. Sa molimauina foi i faigamalologa o le Kilisimasi 2023, na togi pau e le Star Kist le Lady Samoa, e la’ula’u ai le aufaigaluega i Samoa, mo aso malolo, ma aso fiafia.
O loo talia se tatou tali mai le Susuga a Pa’u Roy Ausage, i lana faasalalauga, o avanoa faigaluega ile Star Kist, ile tulaga tau apitaga o tagata la’u i Amerika Samoa, po ua iai se suiga.
