Ou te faapa’i atu ma le agaga faaaloalo i le paia maualuga o si o tatou atunuu i ona tulaga faalupe. Faamalo le soifua manuia, faafetai le folau i lenei vaiaso o le a maea.
O nisi o mataupu tupito sa soalaupule ma faamaonia e le Kapeneta i lenei vaiaso i lana fonotaga, ua manatu, e faailoa aloaia atu i le atunuu mo le silafia.
1. Faaauauina pea o le faatupeina e le Malo o le Polokalame mo Gasegase e Auina i Fafo mo Togafitiga. O lenei polokalame (Samoa Medical Treatment Scheme) ua loa tausaga o faatino. O gasegase e lē mafai ona faatino togafitiga i Samoa nei, e iloilo toto’a i lalo o aiaiga o lenei polokalame mo le auina atu i fafo mo togafitiga.
I le tausaga faaletupe o loo faagasolo nei, sa faatatauina le $5miliona mo gasegase e auina i fafo, peitai, ua matauina le siitia pea o talosaga e faatoai mai i le Kapeneta mo gasegase e auina i fafo. O le ala lea ua faamaonia ai e le Kapeneta le tuuina o le $6 miliona Tala faaopoopo, e faaauau ai ona faatupe le polokalame mo le agai atu i le faaiuga o le Tausaga faaletupe o loo faagasolo nei. O le taimi nei, o loo auina i Niusila gasegase mo togafitiga.
O le vaai mamao a le tatou Malo, ia mafai ona faatino le togafiti lava i Samoa nei o gasegase, e aunoa ma le toe auina atu i fafo. Afai e moomia tomai faapitoa tau fomai e le o maua i Samoa nei, e iai auala ma aiaiga e uia, ina ia mafai ona auai mai fomai e iai tomai faapitoa, e togafiti i Samoa a tatou gasegase, ma taofia ai le toe tau malaga ese o nai o tatou tagata i Niusila po o Initia e faatino ai o latou togafitiga. O loo agai nei i ai fuafuaga a le Malo i le tulaga lenei.
E taua tele le vave vaai o fomai a o lei oo ina tulaga faigata se gasegase. O le fautuaga faalesoifua maloloina e masani ai le faafofoga a le atunuu – E sili le puipuia nai lo le tau togafitia. O se faamanatu e ao ona ave iai le faataua a tatou uma, aua o togafitiga a fomai, e tele le avanoa e mafai ona toe faafoi ai le malosi pe faasaoina ai le soifua o i latou e gasegase, pe afai e vave ona maua ma’i, aemaise lava i gasegase ogaoga e pei o le kanesa, mai o le fatu, ma isi. O le fautuaga, ia faatino siaki faafomai, ma tausi le soifua maloloina e pei ona fautua mai alii ma tamaitai fomai.
2. Tofiga o le Taitaifono ma Sui o le Komisi o Galuega a le Malo
Ua faamautu tofiga mo le Taitaifono ma Sui o le Komisi o Galuega a le Malo e tusa ai ma le Vaega 7 (84) ma le (85) o le Faavae o le Malo Tutoatasi o Samoa. O nisi nei o tofiga maualuluga ma tāua a le tatou Malo, aua le faafoeina lelei o galuega a le Malo, e tauala atu i le Komisi o Galuega a le Malo. O le faatulagaga o Sui o le Komisi, e toatolu (3), e aofia ai le Taitaifono, ma Sui o le Komisi e toalua.
I le amataina ai o galuega a le tatou Malo ia Iulai o le tausaga na te’a nei, sa tauaveina ai e le afioga ia Lauano Vaosa Epa ma Nonu Lemauga Saleimoa Vaai tofiga o Sui o le Komisi ina ua faamavae le Taitaifono sa iai, ia Aiono Mose Sua, ma se tasi o Sui o le Komisi – le Tofa Auelua Samuelu Enari. Sa se’e mai Lauano e tauave le tofiga o le Taitaifono seia o’o ina tuuina mai lana faamavaega i le vaiaso na tea nei.
O lea ua maea le filifiliga o Sui o le Komisi mo le faamaoniga a le Ao Mamalu o le Malo.
Ua tofia i le tulaga Taitaifono le afioga Nonu Lemauga Saleimoa Vaai, e sui tulaga i le afioga ia Lauano Vaosa Epa, ua faamavae. Ua tofia le afioga ia Gatoloai Tilianamua Afamasaga ma le afioga ia Fonoti Perelini o Sui o le Komisi. O nei tofiga e ta’i tolu (3) tausaga ma toe iloilo.
E avea lenei laolao e momoli atu ai le faamalo ma le faafetai a le tatou Malo i le afioga ia Lauano Vaosa Epa, mo lana tautua i le Komisi e ala i tofiga o le Sui, ma le Taitaifono o le Komisi. E le gata foi i lea, a o isi ona tofiga sa tautua ai i le Malo, e ala i le tofiga o le Ofisa Sili o le Matagaluega a le Palemia ma le Kapeneta i tausaga ua mavae. Faafetai le tautua mo si o tatou atunuu, ma le Malo. Ia saga faamanuia le Atua i fuafuaga mo le lumanai.
Ia sagai ane ai o le lagi i tamalii ua tofia nei, mo le faaauauina o le galuega a le Komisi o Galuega a le Malo. Ia manuia lo outou tulai mai.
3. Tofiga Taitaifono ma Sui o le Komiti Faufautua mo Totogi (Remuneration Tribunal)
Ua faamautu fo’i tofiga mo le Komiti Faufautua mo Totogi. O lenei Komiti na muai faatuina i le 2003, i lalo o le Tulafono mo le Komiti Faufautua mo Totogi.
O se tasi o Komiti aogā ma lavelavetū i le faatulagaina o totogi o le aufaigaluega a le Malo i le 18 tausaga ua mavae. E manatu le tatou Malo, e ao ona faaauau lenei galuega taua, ina ia mafai ai pea ona mataitu tulaga o totogi o le au faigaluega a le Malo, ma fautuaina le Kapeneta i le agai atu i le lumanai.
E toatolu (3) Sui o le Komiti, e aofia ai le Taitaifono ma Sui e toalua. O tamalii sa umia nei tofiga e aofia ai le Tofa ia Mulitalo Aliimuamua Esekia Solofa i le tulaga Taitaifono, ua tuumalo. O Sui, na aofia ai Matataualiitia Afa Lesa, ua tuumalo, ma le afioga ia Afamasaga Toleafoa Faamatala. Sa tofia taluai nei Tuiloma Sina Retzlaff e sui tulaga ia Matataualiitia Afa Lesa.
O tofiga ua faamautu nei, e aofia ai le afioga ia Tuala Farani Chan Tung i le tulaga Taitaifono. E faaauau le tofiga o Tuiloma Sina Retzlaff, atoa ai ma le afioga ia Muaausa Joseph Walter e sui tulaga i le afioga ia Afamasaga.
Ou te faaleoina le agaga faafetai o le tatou Malo i le tautua a le afioga i a Afamasaga Faamatala i le tele o tausaga sa ia tauaveina le tofiga o le Sui o le Komiti lenei. E le itiiti lona sao i fauina o fautuaga anoa a le Komiti sa tuuina mai i le Kapeneta i tulaga tau totogi o le aufaigaluega a le Malo.
E ui foi ina fai i lagi le folauga a le Tofa Mulitalo Esekia Solofa, ma le afioga ia Matataualiitia Afa Lesa, ae ua tautalaaso a la galuega, sa punouai ai i le Komiti lenei. E manatua pea lo la sao, ma le auaunaga i le tatou Malo e ala i o la tofiga.
Mo le Komiti ua tofia nei, ia manuia lo outou tulai mai, ma ia vaatele pea i le Atua lo outou faiva.
Ia manuia le faafofoga tapuai a si o tatou atunuu, ma ia auaaliitia e le Atua i tatou uma i le agai atu i le faaiuga o lenei vaiaso.
