Faasolo i aoga tulaga lua a Savaii le siaki ina o taliga o fanau

SHARE NOW

Ua faasolo atu ai i aoga tulaga lua uma o Savaii le polokalame faagasolo a le Matagaluega o aoga taaloga ma aganuu ma le Matagaluega o le Soifua maloloina o le siaki ina lea o taliga o fanau i le vasega tasi.

O le vaiaso ua mavae na faamaea ai ma le manuia aoga uma iinei upolu, peitai o le aso ananafi sa amata ai loa le siakiina o fanau o le itumalo o Asau 1 ma le 2, faasolo ifo ai i Savaii Sisifo ma le Itu o Tane 2.

I le itulau a le Matagaluega o aoga o loo faailoa ai na faigofie le faatinoina o le latou galuega ina ua talisapaia e matua le polokalame e ala i le latou lagolago atu.

E faamaea ai i le aso le Itu o tane ma Savaii i Sisifo ao lei faagasolo i isi aoga seia maea lenei vaiaso.

Ua afua ona faatino lenei galuega taua ina ua maitauina e le Matagaluega o le soifua maloloina le siitia o fanau iti e faaletonu le faalogo ma e manaomia le faia ai o se galuega pe afai ua nofoai matua.

O le faanaunautaiga o le matagaluega o aoga i lenei faamoemoe ia maea ane ua iai se suiga o le faalogo a fanau iti, aua ua avea o se faafitauli tele lea i lo latou soifua aoaoina e ala i le le mafai ona lagoina se faatonuga poo se lesona o aso taitasi.

O lenei faamoemoe o loo galulue faatasi ai le Senese, Loto taumafai, Matagaluega o aoga ma le Matagaluega o le Soifua Maloloina.