Ua galulue faatasi ai nei le Matagaluega o aoga taaloga, ma aganuu ma le Matagaluega o le Soifua Maloloina e faia se fesoasoani mo alo ma fanau o vasega tasi o aoga uma i Samoa o le siaki ina lea o le faalogo poo taliga.
I le feiloaiga a tusitala ma le afioga i le Ofisia sili ia Ae’au Christopher Hazelman i le vaiaso ua mavae, na ia faailoa mai ai o le tasi lea o a’afiaga tele o aoaoga a fanau.
O le lelei o le faalogo i taimi o aoga, ua avea ai ma auala e faigata ai i fanau ona malamalama i se faatonuga ma lesona o loo aoaoina mai e faiagoa.
Peitai saunoa le Ofisa Sili o le Matagaluega o le soifua maloloina ia Aiono Dr Alec Ekeroma, e tusa o le 90 pasene o alo ma fanau tai 3 tausaga le matutua, ua faamauina le faaletonu o le faalogo poo taliga .
“Ae tusa o le 10% ile 15% fanau e tai 12 tausaga le matutua e faaletonu foi o latou taliga,”
Saunoa Aiono o fanau la nei a le faia ai se togafitiga o le a matuai tele le avanoa e faaletonu ai o latou soifua faaleaoaoga.
Peitai ua talosaga mai foi le afioga ia Aeau o le galuega lenei o le galuega fai faatasi a faiaoga ma matua, o le aso o lea faatino ai lenei galuega e manaomia ai le auai o matua mo le faatumuina o le pepa a lona alo ma tauaao atu le pepa tui lea sa faaaoga i taimi o le Koviti.
O le vaiaso lenei ua faagasolo ai fomai o le Matagaluega o le soifua maloloina mo le faatinoina o lea faamoemoe taua,e aofia ai ma nisi o le Matagaluega o aoga mo a latou faamaumauga.
E oo atu ai le faasologa o lenei polokalame mo aoga tulaga lua uma o Savaii i le vaiaso fou.
