E le’o avatua se tali aloaia a le Fofoga Fetalai ole Palemene o Samoa, Li’o Papalii Taeu Masipa’u, e tali atu ai ile tusi a le taitai ole HRPP, Tuilaepa Sailele Malielegaoi.
O le tusi o loo fesiligia ai Li’o i sona finagalo ile faagafua ai o nofoa o faipule (ia Tuuu Anasii o le itumalo o Siumu ma Ale Vena Ale o le itumalo o Faleata lV) ina ua faamavae ese mai le la Vaega faaupufai, le HRPP.
Peita’i ole tusi lena a Tuilaepa, ua afua ai ona faalauiloa faalauaitele mai e le Fofoga Fetalai lona finagalo: “e iai lona faaeteetega ile ma’alea’le ole faagafua ai o nofoa o ia itumalo ona o tulaga aia tatau faalefaavae a Sui Usufono, e tusa ai ma le vaega 47 o le Faavae ole Malo Tutoatasi o Samoa.
Ma ua ia manatu ai e tuuina atu i le fono a le Palemene lata mai, i le aso 20 O Tesema, mose faaiuga talafeagai o lea mataupu.
Pei ona tatou ulua’i lipotia le tali mai a le Fofoga Fetalai ile mataupu lea: “e leo faamavae mai faipule o Faleata ma Siumu i le Palemene ae o le Vaega faaupufai sa iai, le HRPP.
E oo mai nei, e ui o loo faasala le taitai o le HRPP mo le lua tausaga e le mafai ai ona auai ini fono a le Palemene, ae o loo maitauina le mausali pea lava o lona ta’ita’ina ole HRPP, poo le Itu o loo agaia le faigamalo a le FAST.
O ona finagalo faaalia, o tauala mai i ana fonotagata faalevaiaso ma ofisa faasalalau.
