E fa tino maliliu ua faatali ai o latou suesuega faaletulafono ise tala mai le faamasino o maliu lilo poo le Coroner.
O na tino maliu e fa ua taofia ai mo suesuega faaletulafono pei ona tali mai le afioga ile Komesina o le Matagaluega o Leoleo, Auapaa Logoitino Filipo i tatou fesili e aofia ai le tamaitai leoleo 31 tausaga le soifua, na aafia ise pulufana ma maliu ai.
Ua taofia e leoleo le alii o tuuaia, ma molia ai ile fasioti tagata.
Ae i tala mai totonu, o le alii ua molia sa leoleo muamua, ma e faapaaga ma le tamaitai leoleo ua maliu.
O le faalavelave na tupu i le vaveao o le aso Toonai talu ai a’o lumana’i le Kilisimasi.
O lesi maliu na tupu i le vaveao o le Kilisimasi, ile tali mai a le Komesina o Leoleo ile tatou fesili: Ole tama 28 tausaga le matua sa molia muamua a’o soifua i lona taumafai e faaoo le maliu ile tama 20 tausaga.
Peita’i ole feeseeseaiga lea na tupu i le vaveao ole Kilisimasi, masalomia na mafua mai ile inuga ava, ma faaosofia ai le feeseeseaiga, na ta ai e le 20 tausaga lesi tama 28 tausaga pei ona saunoa le komesina o leoleo ua molia ai le tama 20 tausaga i le fasioti tagata.O lesi tama ua molia foi ile fasi oti tagata ile amataga o le vaiaso talu ai i Samalaeulu, ile tala a le Komesina o leoleo, Auapaau Logoitino Filipo, ole feeseeseaiga foi na tupu, ma togi ai e le tuagane le toalua o lona tuafafine i le maa tau i le fatafata ae maliu ai ile faaiuga o le vaiaso, ma o loo taofia ai le tama ua molia, e tali i ona moliaga i le faaamasinoga i le masina fou.
Ole tagata lona fa o loo taofia ma molia i le fasioti tagata, o le tama na ia fasi lona atalii 12 tausaga, i Palisi.
Saunoa Auapaau, o le salu o loo molimauina na faaaoga ile faaoolima a le tama i lona atalii.
O le masina fou o Ianuari e valaau ai foi le tama lea e tali i le moliaga a leoleo faasaga ia te ia.
Peita’i e ese ma i faalavelave o ta’ua i luga, ae ile tulaga aoao tetele, pei ona saunoa le Komesina o leoleo.
Na matua manaia ma saogalemu le kilisimasi, ma usitaia e tagata ole atunuu fautuaga na tuuina atu, ma roadblock na tuuina atu. atonu ua aoga fautuaga ma timaiga na tuuina atu, ua usitaia ai e le atunuu le ave taavale onana ma faafetai: ” faafetai ile mamalu o le atunuu, ile fesoasoani mai ile Matagaluega, ia maua le mafutaga e tatau ona iai, o le fiafia ma le saogalemu, e faafetaia ai le atunuu.
