E leai se iai ua molia pe o masalomia foi ile maliu faafuasei ai ole tamaitai pule o le TV3. O ananafi lea na faato’a maua ai le tino o le tamaitai Afioga a Aotearoa Pesamino Mayor i lona maota i Ululoloa, ina ua uma ane le taeao e lei maua mai se tala pe iloa atu i luga o fesootaiga televave ma saili ai loa.
O le aoauli o le Aso Faraile na gata ai le alu i luga o lana FB, peita’i na saunoa le tamaitai sui Komesina o le Matagaluega o Leoleo ma Falepuipui, Susuga Papalii Monalisa Keti, i le tatou toe tuliloaina o le suesuega, e oo ane i le aoauli ananafi, o loo faia pea suesuega a leoleo.
O le lipoti a leoleo e o faatasi ma le lipoti a le foma’i mai le falemai tele i Motootua, ma avatu i le Faamasino o Maliu mo sana faaiuga ile faaauau atu ai o le suesuega mose taotoga faaletulafono, e iloa ai mafuaaga o le maliu.
E oo mai nei e le’i iai lava se fomai mo maliu lilo a Samoa, o loo aumai lava fomai mai Niusila ma Fiti e faatinoa lena galuega.
O le tamaitai Pule o le TV3, ua tusa o le fitu tausaga talu ona galue ai mo le Leitio Polenisia ma le TV3. Na soifua ane i Amerika aoga ma galuea ai, se ia oo ina toe foi mai i Samoa ma galuea ai i kamupani o taua i luga ia Aukuso o le 2015.
O le taimi nei o loo taoto ai lona tino maliu i le maota gasegase ole TTM Motootua, e talia ai suesuega a leoleo o loo faagasolo.
