O le faaopopo ai o tamaitai ile Palemene, ose tulaga na talia lelei e le afioga i le Sui taitai o le Vaega faaupufai a le HRPP, Fonotoe Lauofo Pierre Lauofo.
O le afioga a Fonotoe ole faipule filifilia o le Itumalo o Anoamaa 2, lea ua lua ai nei ona faipule ile Maota faitulafono, ina ua sao mai i totonu le Afioga a Toomata Nora Leota sa la tauva mai ile palota tele o Aperila 2021.
Ma atagia ai ile saunoa a Fonotoe, ose laasaga lelei tele aua o le’a manuia ai lona itumalo.
Ole faaiuga a le faamasinoga lea ua taatia atu ai nei ile Fofoga Fetalai o le Maota, e faatauto loa sui tamaitai e toatolu ise taimi vave muamua lava, o le taunuuga lea o le 10 pasene i luga o le tulafono faavae o palota.
Ole mataupu lea na finauina ile masina talu ai ina ua taofia e le Fofoga Fetalai, Lio Papalii Taeu Masipa’u le faatautoga o faipule e toalua, Ali’imalemanu Alofa Tuuau, Faagasealii Sapoa Feagai sei talia le iuga a le faamasinoga .
Peitai lea ua aumai le faaiuga a le faamaisnoga ua faaopopo ai ma lesi sui tamaitai, Toomata Nora Leota, ma ia faatauto loa, ua atoa iai le 54 nofoa o le palemene o Samoa.
I le feiloaiga a tusitala ma le Sui taitai o le HRPP ile vaiaso nei, Na ia ta’ua ai, o le faaopopo o lesi faipule mo Anoamaa lua, o le a penefiti ai le itumalo. Ole taua ole faaopopo ai o faipule tamaitai, ona e ese foi o latou finagalo faaali.
Ma ose tasi lea o laasaga sa latou taumafai mai ai lava.
