O le taeao nei na fa’ataunu’u ai le fa’atautoga aloāia i le potu fono a le Kapeneta, e aloāia ai Minisitā Lagolago e to’alua ua filifilia mo nisi o Matāgaluega a le Mālō.
Na lipotia mai ele pepa fa’amatalaga ale malo e faapea o le sauniga na fa’atautō ai le afioga iā Foisala Lilo Tu’u Ioane o le Minisitā Lagolago o le Matāgaluega o le Soifua Mālōlōina, e va’ava’alua ma le afioga ia Tea Tooala Peato mo le galuega fesoasoani i le afioga i le Minisitā ia Valasi Luapitofanua To’ogamaga Tafito Selesele.
O le isi tamāli’i o le atunu’u, ua filifilia mo lea tofiga fou, o le afioga ia To’omata Nora Leota mo le tofi Minisitā Lagolago mo le Matāgaluega o Tiute ma Tupe Maua e galulue fa’atasi ma le afioga iā Masinalupe Makesi Masinalupe e lagolagosua i le afioga i le Sui Palemia, o le Minisitā fo’i o lea Matāgaluega, ia Tuala Tevaga Iosefo Ponifasio.
Na momoli le agaga fa’afetai o le afioga i le Palemia, Fiame Naomi Mataafa i le tofia ai o nei tamāli’i o le atunu’u ua filifilia e avea ma Faipule o le Palemene e galulue mo nei tofiga tāua o le Mālō.
Na fofogaina fo’i e le Ta’ita’i o le Mālō le faigatā o le auala sa tauasa mai e le afioga ia To’omata i le taimi o le faigāpalota tele a le atunu’u i le 2021, a’o lea ua fa’aeaina ina ua tini lona fa’amoemoe sa finau mai ai.
O i lāua nei, o Faipule uma o lo’o i le fa’amalu o le Vaega Fa’a’upufai a le Fa’atuatua i le Atua Samoa ua Tasi (F.A.S.T.).
