E leai se faaititia o tagata ole tatou atunuu ua faasolo atu ina faamama toto. Pei ona molimauina ile toe faatau ai o isi masini fou faamama toto e 30 ma faatupe e le malo.
O lena faatauga o masini na faalauiloa e le Afioga I le Palemia Fiame Naomi Mataafa ile feiloaiga ma Tusitala, e siitia ai le lagolago i togafitiga o tulaga faatupulaia o gasegase.
I le lipoti a le Savali a le malo, ua oo lava i fanau laiti ua aafia ma togafitia. Na ia saunoa foi ile aumai ai e le malo o nei masini mo togafitiga, ae o le ‘a faaauau ai foi ona faamalosi’au i auala e maua ai le soifua maloloina o tatou tagata.
O masini fou ia e 30 ole’a fesoaosani i isi masini e 30 o loo faaaoga ai ile falemai Motootua, mo le tusa o le 200 gasegase.
Ae ole fale faamama toto i Tuasivi Savaii, e iva masini o loo iai, mo le togafitiga o gasegase e toa 24 oi le motu tele.
Ole tausaga e 2005 na amata faavae mai ai le Falemai faamama toto a Samoa, taimi lena sa na’o le to’a ono gasegase na iai, ae 11 masini faamama.
Ae ua alu ai tausaga, ma tupu foi le aofai o gasegase. Ma fausia ai e le malo le falema’i autu ma masini mo togafitiga, I Motootua, ma faaalu ai le $1.7miliona.
