Fa’atoese faalauaitele le PSC ile siata na tuuina mai luga

SHARE NOW

Na faatoese faalauaitele mai ai le Komisi o Galuega o le malo le PSC e tusa ma se siata poo se post na tuuina mai luga ile faaiuga o le vaiaso ua mavae.

Ma le faaupuga oloo i luga o lenei siata “Be smart! No one cares about your efforts, only the results”, o lona uiga pe a faasamoa “Ia poto, aua e leai se isi e amanaia pe kea atu i lou tomai, na o le taunuuga”

Peitai e lei atoa se itula o lenei siata i luga o le itulau a le PSC ae maitauina ai le vevesi o le mamalu o le atunuu ma faailoa o latou finagalo e ala ile share o le post ma faapea o loo faatatau lenei tusitusiga i tausi soifua.

Aua o le vaiaso lava lea ile uma ane o soalaupulega a le PSC lea na latou teena ai le talosaga a le Asosi o tausi Soifua e manaomia le maua o a latou ovataimi ma se siitaga o latou pay.

O le vaiaso foi lea na lauga ai le latou Minisita le afioga ia Tafito Selesele ma le afioga ile tamaitai Palemia ma upuia ai le leaga o le faatinoina o le galuega a fomai.

Peitai na toe tuuina i lalo e le PSC poo le Komisi o Galuega a le Malo lenei siata ae tuumai i luga le latou faatoesega ma faamalamalama mai ai e faapea

“O le polokalame masani lava lea i le amataga o tausaga faale tupe e faamautu ai SINI AUTU – (Key Results Areas – KRAs) poo (Key Performance Indicators – KPIs) o galuega fuafuaina faatino – a sui o Pulega ma le Aufaigaluega uma a Matagaluega e 18 o loo vaaia e le PSC mai le tala o le Tupe Fou 2023/2024 e pei ona pasia aloaia e le Palemene i le Aso Faraile 30 Iuni 2023.

“Ae o le ata e pei ona lagalaga ai finagalo, o loo molimoli atu ai le feau taua o lenei faamoemoe, – O LE GALUE MA LE ATAMAI (WORK SMART).

O le feau autu, ia ave le faamuamua i vaega taua e tatau iai ina aua nei tigaina pe ma’imau le malosi (EFFORT). A ia alu aoga lelei le malosi, leai se tigaina (No Stress). mo le ausia o SINI AUTU (KRAs / KPIs) ma le fiafia.