Ole pepesi ole Dengue Fever i Samoa ao tapena lana taligamalo ia Oketopa, lesi lea mafuaaga ole aumai ai pea o fautuaga faaauau a le Matagaluega ole Soifua Maloloina, ina ia faatamaia nofoaga o tautuufua ai name.
Ole lipoti mai le falemai lata mai nei, mai le aso 29 Iulai – 4 Aukuso 2024, na toe faamauina ai foi isi tagata e toa fa, ua faamaonia mai suesuega fai, le maua ai o siama ole dengue fever.
Ua oo atu ai ile 494 tagata ua aafia i siama ole dengue fever talu mai Novema 2023, peitai e leai lava se soifua ua maimau.
O i latou ile va ole 20 – 29 tausaga le matutua lea oloo sili ona aafia ile siama pei ona faamauina. Aemaise lava i vaega tumutumu ole taulaga i Apia ma vaega i matu sisifo o Upolu.
Ole fautuaga masani lava, pea ua iai auga ole dengue fever ia vave vaai se fomai lata ane.
