Ua faasala e le fono o le Aso Gafua a le afioaga o Salelavalu alii e toatolu o loo sailia e leoleo.
Ua faasala, talu o latou sootaga i laau marijuana lea na ati e leoleo i le Aso Toonai talu ai. E 35 laau ua i lima o leoleo.
Saunoa le afioga ile Sui Komesina, Papalii Monalisa i luga o le telefoni ile faatalanoaga ma Tusitala: sa maua se feiloaiga a leoleo male afioaga i le Aso Gafua ananafi. Ole osofaiga lea i le Aso Toonai, na’o marijuana na maua ane e leoleo ae leai ni tagata.
I tatou sailiga na iloa, ai ole togalaau lea na maua o tai lava i le aai sa fai ai, i Salelavalu tai. Peita’i o molimauina mai e tetele isi faatoaga laau i uta, i le talaloa poo fanua galue.
O le osofaiga a leoleo i le Aso Toonai talu ai, na gata ane lava i le auala ta, e le’i mafai ona sopoia le auala pefu, ina ua poloka ane leoleo, ma toe foi ai tai.
Na ta’ua e le afioga ile Komesina Aapaau Logoitino Filipo ina ua tatou fesiligia, na aafia loa leoleo e to’alua i pulu salalau ane, toe foi mai loa i tai. Sa leai se manatu e fai se faataututuuga.
Ae ole tala mai totonu, o le togalaau lea i Salelavalu ua leva ona fai, Ma sa maitauina, e iai lava tagata e nonofo faasoloatoa ai i uta e leoleoa, ae tasi lava se tagata e alu ane i tai e fai atu se faatau.
O le togalaau marijuana lea , pei ona faalauiloa e leoleo, i lana faamatalaga faalauaitele, o tagata lava o le nuu o Salelavalu na logoina leoleo i lea faiga faasolitulafono i totonu o le nuu.
Peita’i ile uma ane o le fono a le afioaga ma leoleo ile Aso Gafua ananafi, ua taatia ai nei i le nuu e latou momoli anea alii fai togalaau nei ile ofisa, Manuia Tanuvasa poo Manu Lafaele; Masina Lega Taulelei poo Tiata ma Apisoloma Setu poo Sula Setu faatasi ai ma isi, pei ona saunoa le komesina e toa fa isi o loo masalomia.
Ae ua tatou maua foi, o le aso lea e malaga atu ai le afioga i le Komesina, i Salafai ona o le mataupu lava lenei, i le tausia o le filemu aemaise ole saogalemu o soifua.
O masalomia, e matua mamao lava le togalaau lea ei gauta o Salelavalu nai lo le togalaau na maua talu ai mai le Ituotane i le Vaotele.
O mataupu faapea, e masani ai lava, e soalaupule lava i le va nonofo ai o alii ma faipule o afioaga ma leoleo. Ma ua iai foi le fuafuaga a le Afioga i le uma ane o lana fono i le Aso Gafua, ananafi, o le’a savalia lava e matai ma auaiga, i latou e ana faatoaga ise taimi vave lava mo le saogalemu.
