O le tuuaia pea o le EPC i le taugata ole uila e ui ina faapa’u le 20 pasene o lea oloa, Na tali fuaitau ai lona Minisita ile Palemene i le ananafi, Afioga a Afoa Olo Fiti Vaai, ma ia tatalo mai ai ile mamalu o le atunuu ma le Palemene sei onosa’i atu lava, ae sei faatino galuega e au ai ina taugofie le eletise i le lumana’i.
Talu e tele manumi e taunuu atu o loo iai i totonu o le EPC, e tatau ona faamafola, talu o iina tonu lea e poloka ai famanuiaga e taugofie ai le uila mo tagata uma.
“E le’o toe umi ona amata lea o tauofoga, ua 12 kamupani ua oo mai manoaga e fia galulue i Samoa, ma e le mana’omia ni tupe a Samoa e fai ai a latou pisinisi, e omai lava latou ma latou tupe.
I le auliga manuminumi a le Minisita o Galuega lea o loo faia nei, na tau ane ai i lesi foi mafuaaga ole taugata ai ole Uila i le tatou atunuu.
“Faanoanoaga ona o lea e to’alia le mataupu lea ise middle man company, ua tu i le va o le EPC ma soo se kamupani e fia omai.
“Na ou oo mai aveese atu lesi middle man kamupani sa pologa ai le EpC, ile fia o tausaga, ae o lea foi ua toe onoono mai ma lea mea, ae onosa’i le tatou atunuu, sou taumafai e auli le maanuminumi lea ei totonu o le faalapotopotoga lea.
“E le logomalie i le faafofoga a le atunuu, le fai o kamupani e tu faaogatotonu, ae ua le faaaogaina le tomai ole pulega ole EPC.
Saunoa ma le mautinoa le Minisita o le EPC, ua iai silafia ma tomai i le aufaigaluega a le EPC o iai nei e latou te gaosi ma faasoa ai le tatou lava eletise, ae ese le tulaga lea na tau mai iai ile faagaioina ole EPC e se kamupani ese.
“E manaomia tagata i totonu o le Matagaluega lenei e tetele fatu, tulou le faafogafoga a le atunuu ma le Palemene, o le taimi lenei ia lava onosa’i mai.
O kamupani nei ua omai e su’e latou manuia i totonu o Resources a le Atunuu. lea foi na omai e mana’omia le Govt. gurantee. Faafefea ona tatou gurantee le $136miliona tupe Amerika? Faafefea ona tatou gurantee na mea.
O le tele o le manumi lea o loo talanoa ai le Minisita o le EPC, Afioga a Afoa Olo Fiti Vaai, ona e le gata ina ole Kamupani mai fafo, ae ua galue i lalo o le Maliega ua uma ona saini faapitoa, e latou te faia galuega e mafai ona faatino e le aufaigaluega a le EPC o iai nei.
“O se taimi taunuu mai le lipoti i le mea lea, ae o le kamupani lea o le kamupani mai fafo, ae aafia ai i totonu ii.
O le kamupani lea na saini mai le MOU mai fafo i Amerika. Saina e ai? Saini e tatou. O lea oute su’eina poo ai Shareholders o le kamupani lea.
Ae le’o lesitalaina i totonu o Samoa. Ae a fua i le galuega na fai i Solars ia, e malamalama lelei lava le aufaigaluega a le EPC i le faiga o Solars. Sa fai muamua foi. Ae o le a le mea lea ua tula’i mai? E tu tu ai le vaega lea i totonu. Ae maua le latou Commission. E le talia e le faigamalo ni faiga faavalevalea faapenei, tulou.
Peita’i na faauilavea le sui ole HRPP, o le Itu Agai, le Faipule o Samatau ma Falelatai, Lupematasila Tologata Tile Leia ma saunoa e faamaonia le folasaga a le Minisita o le EPC.
“Talu ai o au sa tauavea le sa o le EPC i le 10 tausaga talu ai, ae le’o auai mai le kamupani o tuaia, O le kamupani lea na ta’ua e le Minsita o le Street Market, o le tatou MOU na saini e le tatou malo i Niu Yoka ma le kamupani, e fesoasoani mai i le tatou faalapotoptoga ma le atunuu ina ua Upscale le tauofoga, ua fiu e fai tauofoga, e aumai lava e le taugofie le tau o le eletise.
Na ta’utino foi e le faipule lava lea o le Itu Agai, e le’o se mea fou le faitioina ole taugata o le eletise, sa tupu foi ile faigamalo talu ai, i lona taimi ao avea ai ma pule o le EPC.
“Na faitio foi le HRPP i le EPC pe aisea e taugata o le renewable, ae faimai, e ala ona taugata le tender o le renewable ona e laititi le economy upscale o loo fai ai, lea na taumafai ai e tuu faatasi le remaining le vaega e toto o le eletise e gaosi e le suauu, tuufaatasi ia tele ona fai ai lea o le tauofoga.
Peita’i ua tatalo mai le Minisita ole EPC, i le atunuu, ina ia onosa’ia mo sina taimi ae se’i fai muamua lana auli ga manumi i le faafoeina o le EPC. Ae silia i le 10 kamupani gaosi eletise faafouina ua fia omai ma latou lava tupe e gaosia ai le eletise ma faasolo ai ina taugofie.
Peita’i, o le lipoti o le auliga manumi a le Minisita o Galuega ma le EPC, na ofo atu ai foi le fesoasoani a le Minisita o le Matagaluega o le Siosiomaga ma Oa faanatura, Toesulusulu Cedric Schuster, i ana ia foi faamaumauga, o le Kamupani lava lea na ta’ua i luga:
“Carbon Credit, tasi lea mea e mana’o ai le Kamupani lea e avatu le 18 pasene carbon 9-12miliona tala Amerika ma latou, o lo o iai faamaumagua .
Mai le palemene ile aso ananafi, i le faatalanoaina o lana
TULAFONO TAU FAAOFI O LE FAATATAUINA O TUPE FAAOPOOPO (Nu.1) 2022/2023”
Faitauga Muamua
Faitauga Faalua
Tuuina atu i le Komiti Faa-Palemene
Iloiloga Auiliili
Faitauga Faatolu
Maliega a le O Le Ao o le Malo.
Ua faaiuina ma le manuia iloiloga ma taualumaga a le Fono Aoao Faitulafono i luga o le Tulafono Tau Faaofi ua taua, i ona laasaga uma seia oo ina pasia e le Maota e ala i se lafo faatu, ma faagasolo faatasi ai ma faasaoga.
O le a tuuina atu loa lenei Tulafono Tau Faaofi mo le Maliega a le O Le Ao o le Malo, ina ia avea ai lenei Tulafono Tau Faaofi ma Tulafono aloaia a le Palemene o Samoa.
E toe feiloai ai le Palemene i lona Maota i le aso a taeao, Aso Faraile i le ta o le 9 ile taeao.
