Fai meaalofa le Pulega o le Suavai i fanau o le Toomaga

SHARE NOW

Ua taimua ai le Pulega o le Suavai e momoli le agaga o le Kerisimasi i alo ma fanau o loo i le Toomaga, e le gata o meaalofa ae o pesepesega ma faafiafiaaga.

O le agaga o le Pulega pei ona saunoa le afioga ia Namulauulu Irasa Mauala, ia toe faafoi le tamaoaiga i le mamalu o le atunuu ae sili lava i nofoaga o loo nofoia e o tatou tagata o loo mafatia, e pei o le Toomaga o loo iai fanau sauaina.

E lei vaai le Pulega i le matutua ma le laiti o fanau ae na matuai faatinoina ma le faamanoi a latou faafiafiaga ma polokalame o le Kerisimasi ina ia maua uma e fanau o loo ile Toomaga le lagona o loo maua e fanau o loo mafuta ma o latou matua.

Taua foi e nisi o le Pulega i le pepa o faamatalaga le ootia o latou loto ina ua latou vaai tino le laiti o fanau teine o loo faamautu i le Toomaga.

O le asiasiga a le Pulega e le na o le auvatu o meaalofa ae o le tuuina atu o le mafanafana ma le lototele i fanau ia aua nei toe manatunatu pea i mea na tutupu i le tuanai ae ia maua le fiafia o le Kerisimasi.

Na ave le agaga o le faafetai ma le fiafia e le Peresitene o le Toomaga ia Siliniu Lina Chang ile ofisa sili o le Pulega o le Suavai le afioga ia Fuimaono Dominic ma lana aufaigaluega.

Mo le manatu atu i fanau o loo ile Toomaga aemaise o le nei vaitau o aso fiafia, e saoloto ai fanau mo tafaoga ae ua saisaitia ai fanau i totonu o le lotoa ona o le puipuiga lava o latou saogalemu.