Ua fa’amauina le agaga fa’anoanoa, ole Malo ma le Matagaluega o le soifua maloloina i le maliu ai o se tinā e 88 tausaga o le soifua ile faamai o le Koviti 19.
O le tinā lea, e leai ni ona gasegase tumau ma e leai ni ona tui puipui o le Koviti – 19 na fa’atinoina.
E leai nsi faamatalaga tele ole tina matua ua maliu, o tuuina mai ile faamatalaga faalauaitele a le Matagaluega, vagana ai le faapea mai o le tina ua maliu ile va o le aso 3-7 Iuni lea e gata mai ai faamaumauga a le Matagaluega o tala lata mai o le Koviti. Ae momoli atu fa’amaisega ma fa’amafanafanaga mai lo tatou Mālō, i ‘āiga fa’anoanoa.
Peitai, I totonu o lena lava piliota, 3-7 Iuni na faamauina ai e 263 tagata na pisia mai tua, e aofia ai ma le toa 8 na malaga mai ma le siama i atunuu mamao.
Ua si’itia ai nei i le to’a 14,187 le aofa’iga atoa o e ua pesia i Samoa e aofia ai le atunu’u lautele ma e na malaga mai fafo. E to’avalu gasegase o lo’o taofia i nofoaga fa’apitoa i le falema’i ae leai se isi oi le Potu Tigāina (I.C.U.).
O maitauina foi le femoumoua’i lava o le aofai o tagata aafia i le siam i aso o faamauin ai luga, mai le aso 3 -7 o Iuni, 37 , 12 ,63 , 151.
O loo tumau pea le fautuaga mai le Matagaluega, “ia tausisia ma usitā’ia fautuaga fa’alesoifua mālōlōina o lo’o tu’uina atu i taimi uma, e ala i le faia o tali fofoga, tausisia le nofo ma le tutū vāvā mo le lua mita mai le isi tagata, ma ia fa’anofoesea i se nofoaga fa’apitoa o lou fale tau mamao mai lou ‘āiga, pe afai ua masalomia lou a’afia i āuga o le Koviti – 19.”
E fautuaina foi le mamalu o le atunu’u, o lo’o fa’aauau pea tuiga i falema’i uma i totonu o Samoa. Manatua o le faia o tui puipui o le Koviti – 19, o le puipuiga sili lea mo Samoa atoa, e tete’e atu ai i le ogaoga o āuga o lenei fa’ama’i faigatā. O la tatou galuega fai fa’atasi le puipuia o Oe, o lou ‘āiga, o Samoa atoa ae silisili ai e pele iā te oe.
