O lo’o fa’aauau pea ona lagolagoina e le kamupani telefoni o le Digicel Samoa le atina’eina o fesootaiga ma le tamaoaiga e ala i ta’aloga.
Pei ona maitauina ai i le amataga o le vaiaso nei lea na faatino ai le sainigalima ile ofisa autu o le Digicel ma le Asosi lakapi pa’i Samoa, mo lana ta’amilosaga o le Teuila faavaomalo 2023.
I le saunoaga a le Ofisa Sili o le Digicel Samoa, Anthony Seuseu, na ia tau’a ai le agaga fiafia o le Digicel i lana faigapa’aga ma le Samoa Tag e lagolago ai lea foi faagatama.
O lea fa’amoemoe ua fa’atulagaina i tulaga maualuluga fa’ava-o-malo ma o le tausaga lenei o le a fa’alauiloa ai le tele o ‘au, e silia ma le 3,000 tagata o ‘au mai le Pasefika atoa ma au e 10 fa’avaomalo o lo’o tauva i Samoa.
Faaalia e le Peresetene o le Samoa Tag le susuga ia Faaofonuu JP Leota, o loo iai le naunautaiga i le atinaeina o le taaloga. Na ia faaalia foi lona agaga fiafia ina ua faipaaga ma le kamupani telefoni a le Digicel Samoa ma tuu atu lo latou faatuatuaga i lana au ma le komiti faafoe.
Peitai ua fa’ailoa mai fo’i e le Samoa Tag o lea iai ta’aloga mata’ina i le va ofisa o tulafono a Samoa ma Niu Sila ma ta’aloga ua fa’atulaga mo Leoleo a Samoa ma Leoleo a Niu Sila mo ali’i tama’ita’i.
O taaloga talita o le a faia i le va o tamaitai leoleo a Niu Sila ma le auvaa a tamaitai leoleo a Samoa ona sosoo ai lea ma le au a alii leoleo a Niu Sila ma le au a alii Leoleo a Samoa, o se tasi lea o taaloga i le faaiuga o le vaiaso i Apia Park.
O le ulufale i le Faitotoa e na o le $5 tala mo tagata matutua, ae o tamaiti i lalo ifo o le 12 e leai se totogi!
