Ua faamavae le faipule ole Itumalo o Vaa o Fonoti, Susuga a Mau’u Siaosi Pu’epu’emai mai le Vaega faaupufai a le HRPP ile aso.
I lana tusi faamavae ua iai le tatou kopi, o ia tusia ai ana faaviiviiga o lona taitai sa iai ile HRPP. Peita’i ua ave lana faamuamua i lona itumalo ma tagata palota na oo ai ile tofi faipule.
I lana tausi faamavae o loo ia ta’ua “afai e nofonofo ai pea i le HRPP, o le upu moni, e maea le paea’iga lenei , e leai leai leai lava se manaoga o lona itumalo e faataunuuina ona o tulaga faapolokiki , aemaise ai o Vaega faaupufai. “
I lana tusi faamavae lava lea, pei ona ia tusia: O le ala lea o le fesiligia pea o ia e lona itumalo , i ona tupu ma ona ee ma le loaloa ole itumalo, o loo alala i Fagaloa. Ua lua tausaga o lana lauga faataupou i le Palemene, ae leai se mea ua faatinoina.
Ma ose tuualalo foi lea faifaipea a le Aiga Sa Levi ma le pulega a Fagaloa, ona o fita o loo feagai ai pea le itumalo i Aso uma.
I le leaga o auala tetele, ae o le afaina ma le lamatia o le saogalemu i taligalu, ma le gataifale. Ma fesilgia ai , ia pe ua le alagatatau loa ona faasee ese male Vaega faapufai ise auala e ono liliu mai ai le faigamalo e faatino galuega mo le Itumalo ae ua noatia ona o tulaga faapolokiki ma Vaega Faaupufai.
Ma tuuina atu loa lana tusi faamavae aloaia ma ile HRPP i le aso 25 o Novema 2022.
Ole toatolu ai lea o faipule o le HRPP ua savali ese ma le Vaega faaupufai e lei uma le masina o Novema.
