Tala tuliloa o le malaga faavaitaimi lea na tuu e o ese ma Samoa mo Ausetalia ile aso 14 o Oketopa vaveao 4:40am ole aso Lua,
Ole to’a 130 oi latou ia o alii ma tamaitai,i sailiga a le ATA MUA news na maua ai, ose vaega oi latou na tumu i le le fiafia ma oo atu ai lava e logo le ofisa o leoleo, ile faavaleaina oi latou e tagata na tapenaina lea malaga.
O le tagata lea o loo ia aoina tupe mai le $170, $200, e oo atu i le $400 ma le $700 tala sa aoina mai tagata.
O se tama mai Fagalii tai, ia Lamepa Siufaga, e lei manuia le tatou taumafai e fesootai atu i lana numera masani ua le ola.
Ae o faamatalaga mai se vaega o le au piki lea na ia aoina a latou tupe, o taua i luga, na amata mai ia Iuni ona ta’u e alu ai le ‘malaga.
Alu a’i alu a’i faapea e o ile masina o Iulai ma tolotolo mai ai lava i masina sosoo ai.
Ae faaopopo lava tagata e avatu i totonu. Ma sa fai foi a latou fono, e fono solo lava.
Sa faia lesi ile Tuutuuileloloto. Sa fai isi fono i tuamaota o le malo i Apia.
Sa fai lesi fono ise potu o le falemai tele i Motootua. O na fono e iai lava le tagata e avatu faapea o le tagata atu i le ofisa e faia faamalamalamaga o tulaga tau i le malaga.
Sa tatou fesiligia lea ofisa malaga i le sootaga, ma o loo talia se tali mai le alii pule.
Peita’i ile aso Lulu o le vaiaso nei 16 lea na tatou uluai avatu ai lenei lipoti, na oo ai se vaega o alii ma tamaitai ile ofisa o leoleo.
Na fesiligia tusifolau, ma valaau ai loa le Susuga Lamepa Siufaga o Fagalii e avatu tusifolau.
E le’i oo atu ile ofisa o leoleo e avatu tusi folau, ae sa alu ane le teine ile taulaga e piki atu ai. O le aso e toe faaauau ai ona tusi faasea a le aumalaga lea,i leoleo.
Na taua e nei fanau, ua faafia ona fai a latou suavai , o latou faatauga chips, o koko Samoa ma tapenaga masani ai lava, ae o lea faatoa mautinoa lava ananafi, o le taufaavalea lea na fai ia latou ina ua oo atu i le ofisa o le malo, o gafa ma le siakia o aumalaga, e leai se latou aumalaga o tuu e alu.
E oo lava foi ile pepa na tufa atu ia latou ole taimi o le vaalele ile 4 ile vaveao o le Aso Gafua 14 Oketopa, mai Faleolo mo Sini taunuu I le 8:40 am, ma folafola ai o lesi polokalame e tufa ane pe’a taunuu i Sini.
Ae mulimuli ane ai loa logo atu ua le oo le malaga. Ae ua taunuu i Upolu le au malaga mai Savaii, ma nuu i tua.
Aso Lua taufa’i usu ile ofisa o leoleo e logo ile faaletonu lea.
O taua e le tasi o le vaega, pe ana le vave ona maua, lona uiga e toatele lava nisi e faavalea ai ma faauau lava le aoina o tupe , mai le 200 e oo atu i le 400 tala e le susuga Lamepa, o taua e le au malaga o lesi igoa o loo alu ai o Danny, ae o lesi igoa o loo faaaoga i luga fesootaiga televave e talanoa ai i email taufaavalea ma le ofisa malaga, o Alex Lapai.
Ua i lima nei o leoleo lea mataupu, se taimi maua mai se tatou tala mai leoleo.
