Ua fautuaina malosi ai nei e le afioga ile Minisita faalapotopotoga a le Malo, Leatinuu Faumuina Wayne So’oialo, Ta’ita’ifono ma Ofisa Sili ina ia mulimulitaia ia Faiga faavae.
Saunoa Leatinuu, “Oloo maitau e le Kapeneta ma le Malo i nisi Faalapotopotoga oloo soli faavae, ma e tatau i faalapotopotoga a le malo ona usitaia ma mulimulitaia faiga faavae ile li’o o pulega lelei ma galuega faatino a faalapotopotoga a le malo poo le Public Bodies Framework.
Ile feiloaiga lona lua, faaletausaga, a le Minisita ma pulega o faalapotopotoga, e faasoa ai i taunuuga o galuega mo le tausaga faaletupe 2023, aemaise o ona lu’itau ma le agai atu foi e faamautu galuega ma lipoti faa le tausaga ole 2024.
Na ia faamamafa ai i Komiti Faatonu ma pulega o faalapotopotoga le tausisia o pulega lelei, aemaise faaiuga fai e faafaigaluega ma puipuia ai aseta a le malo, ae ole tuuina ae o latou faaiuga ike kapeneta o galuega faatino, ma ia faamanatu ole kapeneta e lautele la latou silasila i vaega uma e tatau ona tuuina atu ai le auaunaga mo le atunuu atoa.
Ia manino foi le taitaifono ma le komiti faatonu aemaise le ofisa sili ma le pulega o faalapotopotoga uma, i alafua ma faamoemoega, o miti ma atina’e a le malo oloo fia faatinoina.
E tatau foi ona faatino ma le amiotonu, ma le lē faaituau tiute ma matafaioi mo le manuia o a tatou faalapotopotoga.
Saunoa le Minisita, “Ua iai nisi faatonu, na tofi atu e le malo e fesoasoani ile komiti faatonu ma le pulega, ae uma ane pei ua tutu faatasi mai ma le pulega ae faasaga tau mai ile malo.
Ma ia faanatu o latou o lupe faalele a le malo, e tauaveina lea itu o lana galuega ina ia ausia sini autu na faatuina ai faalapotopotoga.
Ua ia fautuaina malosi foi, taitaifono ma ofisa sili ina ia mulimulitaia ia faiga faavae, talu ua matau le iai o isi oloo soli faavae.
