O se vevesi na tulai mai i le va o Kolisi e lua o Maluafou ma Sagato Iosefo i le Aso Lua o le vaiaso nei i le maketi Savalalo, na afua ai ona ae se tofa i le komesina o Leoleo, Afioga ia Auapa’au Logoitino Filipo ma le pulega e savalia ai e le Matagaluega kolisi nei e lua, aua se nonofo filemu o fanau aoga o lo’o a’otauina ai.
E leo se taimi muamua lenei ua tulai mai ai lenei faaletonu o le vevesi o fanau aoga i le tuuaga poo le taeao o loo usuai atu ai i aoaoga.
Ma o Afioga i alii Ta’ita’i Leoleo Asiasi ia Tofilau Junior Tofilau ma Tologata Misieliota Tamaleaoa ma nisi o alii ma tama’ita’i leoleo sa fai ma sui o le Matagaluega o Leoleo, Falepuipui ma le Ola Toefuataina.
O le auga o le savali a le Matagaluega e tuuina atu fautuaga ma se tuualalo i fanau o lo’o a’otauina i totonu o le Kolisi nei e lua, e tusa ai ma le vevesi sa tulai mai, ma fa’ailoa i le fanau aoga, e lē ‘alo lava le matagaluega i le faatinoga o lona tiute o le faamalosia o le tulafono ma e iai lava moliaga pe afai e tulai mai ni soligatulafono.
Na faaleo le faafetai a ulu o aoga e lua i le Matagaluega ona o le lagolago ma soosoo tau’au atu i le latou foi pito laau, ma e leo malolo foi le faatonu ma le a’oa’i i fanau aoga e tusa ai ma amioga e tatau ona o latou faia.