Na to’afilemu uma mea uma ile aso ole Eseta, peita’i na le’i lelei le Eseta ile Toomaga mo e puapuagatia po’o le Victim Support Group ina ua faatopetope atu se valaau mo se fesoasoani i se tina ma lana fanau o loo sauaina.
Peitai i se pepa o faamatalaga o taua ai e le Toomaga foliga vaaia o le tina ma lana fanau ina ua toai taunuu atu i lo latou ofisa.
O le tina sa sauaina e lona toalua ile po atoa, ma latou vaaia ai le leaga uma o ona foliga i manuaga mai le faaoga lima na faia e lona toalua, ma ia taua ai ua le mafai ona ia fesoasoani ia te ia lava aemaise o si ana fanau e toa tolu.
O le matutua o tamaiti nei e 5 tausaga o le isi, 7 tausaga o le isi, ae 8 tausaga o le isi.
Na taua e le Toomaga ile pepa lava lea o faamatalaga, o le tuaoi na faafesootai atu mo se fesoasoani ina ua latou faalogina le leo tauvalaau o le tina oloo fia mau se laveaiga Na galulue faatasi le Toomaga ma leoleo na afua ai ona aveese mai le tina na sauaina ma lana fanau mai lima o lona toalua.
Peitai na taua e le tina ile la faatalanoaga ma le leoleo, o si ana tama lea 8 tausaga na sauaina e lona toalua poo le step father o le alualu toto 8 tausaga lenei.
Na taua foi e lenei tina na ia iloa lelei le sauaina o lana fanau e lona toalua, ae sa fefe e gagana nei ogaoga le faafitauli, peitai sa matuai faateia o ia ina ua ia iloa mulimuli ane o loo faia foi e le tama o lona toalua se sauaga i lana tamateine 10 tausaga.
Taua e le Peresiteine o le Toomaga, ua oo lava ilea so o le maliu ma le toe tu o le alii faaola oloo fai lava uiga ma sauaga mataga nei e tagata i o latou lava fanau.
Ma na ia faafetaia le Komesina o le Matagaluega o leoleo le susuga ia Auapaau Logoitino Filipo mo le fesoasoani na mafai ai ona latou faasaoina le soifua o le tina ma lana fanau na sauaina.
