Ua tufa atu ai nei i Ofisa Faasalalau ma Tusitala kopi o Tusi Taiala e limataitaina ai ana galuega fai i le agai i le lumanai, faatatau tonu lava ile faasalalauina o taualumaga a le Palemene.
O le aso Faraile, 20 Ianuari 2023 na falauiloa aloaia ai lea taiala i le maota o le ofisa o le fono, Tofilau Eti Alesana i Mulinuu
Na taimua lea faamoemoe i le mafutaga faaleaoaoga ma na auai le lata ile 30 tagata faasalalau, e aofia ai Tusitala, Faatonu o ofisa faasalalau, Pueata ma le au Pue TV.
O le ma’ea ane o le fetufaa’iga na faasoa ai le Sui failautusi o le Fono , Susuga Yonita Tuia, i le taua o le mulimulitaia o aiaiga ma tulafono o Maota e le au Fasalalau.
Na faasoa foi le sui o le PACMAS, Steve Chase i lona silafia mai taimi sa avea ai ma tagata faasalalau faapitoa a le ABC i Ausetalia i mataupu faapolokiki.
Peitai i le sauniga faalauiloa o le tusi taiala na saunoa ai le Fofoga Fetalai o le Maota, Susuga Lio Papalii Taeu Masipa’u, e faafetaia le avanoa ua ia maua aemaise o lona taimi e galulue faatasi ai, tusitala, aufagaluega, a le fono ae o sui o le maota
“Tele ia o le taua o lenei galuega aemaise lava o le va faafeagai o Tusitala ma le Fono, pei ona silafia na iai lava le faafaigata i aso ua mavae tulaga ile ofisa ole fono ma ana faamaumauga ma talafaasoa, ona e iai ana tulafono e taiala ai,”
“ao lenei galuega taua lea ua aga’igai foi i luma le tatou Atunuu ua ou manatu foi o le taua lea ua galulue faatasi le Fono ma le au Tusitala ona e manaomia lava tala faamaoni ma tala lelei ona faatino i auala moni ma le amiotonu e lipotia mai, o le taua lena o le tusi lea,”
Faafetaia foi e le sui o le Malo o Ausetalia, Emily Luck le JAWS ma le ofisa o le Fono, o le agaga foi lena na saunoa iai le Afioga i le sui Palemia, Afioga Tuala Iosefa Ponifasio, ae o le Peresiteine o le JAWS, susuga Lagi Keresoma ma le faamoemoe e faaauau pea le sootaga ma le malo o Ausetalia i le atinaeina o faasalalauga i le lumana’i.
