O le a’apa atu o Ekalesia Aso Fitu Misiona uma i Upolu nei, ma tapena se fesoasoani o soo se vaega o taumafa ma ofo atu i ‘a’ao o aiga e lata i le 100, ua faaleagaina o latou fanua ma mea toto e aofia ai le faatulaiesea ma Leauvaa, o se vaaiga na faateia ai le afioga i le aso Lua o le vaiaso nei.
E lei manatu Ekalesia ma o latou faafeagaiga i le tulaga o le taugata o le soifuaga, ae o le silasila i le le mautonu o matua ma fanau ao feagai ai ma faafitauli o le faaleagaina o toaga ma nofoaga o loo aumau ai mai le fia tausaga, ua afua ai lea fesoasoani.
E silia ma le 100 taga alaisa, o pusa fagu gao atoatoa, o pusa apa, o pusa saimini, aufai ma soo se mea taumafa na tuufaatasi e Ekalesia e lata i le 30 ma faatino ai le alofa tula’i o auauana a le Atua i le afioaga o Leauvaa.
O se taimi muamua lea ua faatino ai lenei foai e le Ekalesia mo se afioaga, talu ua agina ai i luga i Upega tafailagi le feeseeseaiga o afioaga ona o fanua.
E tusa ai ma le faaiuga a le Faamasinoga i le masina ua mavae e tatau ona oo mai i le Aso 8 o le masina lenei ua tapena ese aiga e lata i le 100 o loo nofoia le 723-eka ua maea soalaupulega a le faamasinoga, e pulea e Afega i lalo o le faamalumaluga a Fata ma Maulolo.
Na tapena e le afioaga le pasese o ta’ita’i ma faafeagaiga o Ekalesia na Malaga e ave le fesoasoani, peitai e lei talia ma toe faafoi.
