Ua faailoa mai nei e le pulega o Tineimu ma Faalavelave e Tutupu Faafuasei e ala ise pepa o faamatalaga i luga ole tatou itulau e faapea e maitauina le mūgalā ma le malosi ole tuāoloa e pei ona faailoa mai e le tala ole tau, ma ua vaaia le mago paa’ā ole vao, ua faigofie ona ‘apoia ma tupu ai se mū, ua faamauina foi le tele o fale ua mu ma togavao i lenei masina.
Mo le silafia e le mamalu ole atunuu ole vaiaso lava lenei lea na tulai mai ai foi se malaia i Lepea ma faatamaia uma ai se tasi o fale e taua ole Home Timber Hardware Samoa, ao lenei ua tulai mai foi se isi malaia fou i Tafaigata ile nofoaga oloo lafoai ai lapisi ma otaota a le atunuu.
E tuufaatasi tala fou i lenei afiafi e leo mautinoa le mafuaaga o lenei malaia.
O fautuaga mai le pulega o Tineimu ma Faalavelave e Tutupu Faafuasei e pei ole aua le toe susuina se,
1: lapisi / otaota
2: vaomatua
Aua le lafoaina mulitapaa i tafā ala ma soo se vaega ua mago ma matūtū.
Tape lelei ini vai motumotu ma lagolago sa fai ai gasesega i tunoa. Mo soo se faalavelave tau mu, ia vave ona VALAAU LE 911.
Ma e FAUTUAINA FOI LE PULE MAMALU A ALII MA FAIPULE, SUI ALII MA TAMAITAI O NUU MA AFIOAGA, SEI O TATOU GALULUE FAATASI MO SE SAMOA SAOGALEMU.
