E $30,000 le tinotupe o lea faamatuu atu nei e le Malo o Siamani i le Komiti ma le afioaga o Faleatiu mo le faaleleia o le faleaoga fou mo alo ma fanau o Faleatiu lea sa faaleagaina e le afi i le masina o Setema o le tausaga nei. Ma ua iai le faamoemoe e sainia le maliega i le va o le afioaga ma le ofisa o Siamani i le Aso Faraile poo le faaiuga o le vaiaso nei.
I le pepa o faamatalaga o loo faailoa mai ai olea faaleleia foi na nisi o fale e lua e sosoo ifo i le faleaoga sa faaleaga uma e le afi.
O le fesoasoani lenei na tauala atu i le malo o Siamani i lalo o polokalame fesoasoani i vaega tau aoaoga mo Samoa nei.
Ma ua tolu ai ia Faleatiu aoga ua mafai ona fesoasoani ma faaleleia e Siamani i totonu o le tausaga lenei 2023.
E le gata ina ofo atu le fesoasoani i vaega tau faatotoga o meaaoga ae o le toe fausia atoa lea o le faleaoga.
Na momoli le faafetai o le tuua o le afioaga o Faleatiu le afioga ia Talimatasi Uili Matafeo i le Amepasa o Siamani i Samoa nei, i le manatu alofa i le lumanai o alo ma fanau o Faleatiu.
“Aua o le mea moni na le mautonu fanau ae o le afioaga ina ua faaleaga ina le faleaoga ae ua lata mai suega faitaulia o le tausaga.
E silia ma le toa 100 fanau o loo aotauina i Faleatiu ma ua fiafia fanau e toe foi le aoga, ae ua mautu lo latou faleaoga fou.
