Na faatolu lelei ona finau le tofa ia Le’aututu Manuia Lameta Brown 26 tausaga mai Ululoloa, e apalai mo se avanoa sikolasipi a le Ofisa o le malo o Iapani talu mai le 2021, ae o lea faatoa manuia ma ua sauni ai e tuua Samoa i le Aso Gafua o le vaiaso fou mo le umi e 2 tausaga.
O le faailoga o le Master i vaega tau malosiaga faaeletise lea o lea malaga atu ai lenei alii e finau ai mo le lua tausaga i le Iunivesite maualuga o Kyoto i Iapani.
I le feiloaiga a tusitala ma Leaututu i le taeao o le aso i le ofisa o Iapani na ia faailoa ai le agaga fiafia ina ua tali mai lana tusi talosaga lona tolu lea mo se avanoa sikolasipi e autovaa atu ai Iapani ina ia faalauaitele le silafia ma le malamalama.
O Manuia o loo ia umia le faailoga o le Bacherlor of Engineering mai le Iunivesite o Aukilani ma sa galuega foi i le Pulega o Malosiaga faaeletise i Samoa nei.
Peitai o nei avanoa sikolasipi o loo ofo mai e le malo o Iapani e le gata ina faamausali atili ai le faiga paaga a malo e lua o Samoa ma Iapani, ae o se avanoa taua foi lea mo fanau Samoa e faalauaitele ai le silafia ma le iloa i le galuega o loo finau ia tino mai.