Ua talafeauga lelei le fesoasoani a le malo o Iapani ua foai, o masini mo faamaumauga o malaga i tuaoi o le atunuu, ma le fonotaga o ulu o malo taitasi o lea talimalo ai Samoa i le tausaga nei.
E $124,000 tala Samoa e tusa lea ma le $46,000 tala Amerika le tau aofai o nei masini e tolu e faia ai faamaumauga (data base servers) o ia masini e televavave toe tele le avanoa e faamauina ai faamatalaga.
Ese mai isi masini e lua mo le faamauina o faamatalaga mai masini autu, a faaletonu masini autu ae o loo mafai ona iai ni kopi o faamatalaga i masini na e lua.
O le auga atoa o nei auala faatekonolosi ua siitia ai le tulaga o masini mo le aoina, faamaumau ma faatusatusa faamatalaga o le aofaiga o tagata e ulufale mai pe malaga ese atu ma le atunuu.
Na ave le faafetai a le Ofisa Sili o le Kapeneta le afioga ia Agafili Shem Leo i le Amepasa o Iapani le afioga ia Keisuke Senta mo le fesoasoani ina ia siitia tulaga o auala faatekonolosi i le Pulega o Femalagaiga.
