“O le alofa o le galuega, e le nao se upu”.
O le autu lea o le aso faapitoa mo tupulaga talavou a le Ekalesia Aso Fitu o le Toe Afio Mai ile lalolagi atoa i le aso 18 o Mati i tausaga taitasi.
Pei ona molimauina ai le lalagaina o polokalame e patiptia ai le tautua a tupulaga talavou i totonu o aiga, nuu, atunuu aemaise ole lalolagi atoa.
Ma taimua ai le autalavou a le Ekalesia Aso fitu i Nu’u i le galuega o le faamamaina ole afioaga atoa, tafa ala, ma le toe faaleleia o se tasi o auala ile nuu ile taeao ole aso toonai, o le vaiaso ua mavae.
I se pepa o faamatalaga mai le Ekalesia i Nuu, o loo taua ai e le sui taitai ole autalavou le susuga ia Norveen Faletolu Poutu Fiaii, ua leva ona feagai le afioaga ma le faafitauli ole lafoai o lapisi i nisi o vaega togavaoa faapea foi tafaala.
Ae ise faatalatalanoaga ma le taitai o le autalavou le susuga ia Penny Pelela, ile maea ane o le latou galuega fesoasoani, na ia faalauaitele mai ai le aano moni o le galuega fesoasoani ale autalavou i nisi o vaega o le afioaga o loo fia faaleleia.
“Oute iloa o le masani lava nei i tausaga taitasi ile polokalame lea a le Ekalesia o le faatauaina o tupulaga talavou, e eseese lava tausaga ma ulutala ma vaega e faaautuina mai ai,
“Ae o le tausaga lenei ua faaautina mai ai Love is a Work, poo le Alofa e faatino, ia poo le galuega foi e iloa ai le alofa, ia pei la ona iai lenei taeao matou filifili ai foi le autalavou iinei Nuu,
“Pei ona silasila mai foi lea ua uma ona tanuina le auala, ia ma faaleleia tulaga o le auala, lea la ua maea le faleleia o le auala, ae ua amata loa ona faamamaina le lapisi,”
Le taitai o le autalavou a le Ekalesia Aso fitu o le toe afio mai i Nuu le susuga ia Peni Pelela.
