Ia maua le agaga o le malo o loo taumafai atu ai, i aiga uma ole atunuu, e amata ona galulue i faatoaga ma atinae tau faigafaiva, lea foi ua sosolo ai lava le tele o nuu ma aulotu ile faamoemoe lava lea e tasi. Pei ona molimauina ai le tolu o talomua ile faaiuga ole vaiaso na te’a nei, Aso Faraile 24 ma le ASo Toonai 25 Iuni, i komiti a tina i Satapuala, Aleisa Sisifo ma Magiagi.
O se laasaga na faafetaia ai foi ele Minisita o Faatoaga ma Faigafaiva, Laaulialemalietoa Polataivao Leuatea Polataivao Fosi Schmidt, komiti tapena o talomua nei e tolu, ile taunuuga manuia ole latou faamoemoe.
O le faamamafa a le Minsita, o le taua o le galulue fagalegalea’i, e selesele foi i faamanuiaga o na atinae. Peita’i na ia faamanatu foi, itu e lu’itau ai faatoaga, i maumaga ma toagalaau, poo manupapagi, o le aafia i manu faalafua ma faama’i.
E taua foi le silafia ona fofo na faafitauli, pe a tula’i mai.
E aofia ai ma le faauaua ai pea ona galulue e tape le manuainiu, lea e le’o te’a mai toaganiu ua lamatia ai na foi atinae.
Ae o le faama’i o aafia ai lau o fa’i, ma isi o loo afaina ai foi mea toto pei o talo.
Na faamatu foi e le Minsita o faatoaga, le fesoaosani $1miliona tala mai le malo, e fesoasoani sa’o lava i tagata o itumalo ma latou atina’e.
Peita’i ole tatalo a le komiti a Aleisa ia faaleleia auala i latou faatoaga, ona ua tele le au galulue i na foi fanua.
Ae ole talomua ile Aso Toonai a Magiagi na faafetaia ai ele Pulenuu, Susuga Luafau Tulima, le malo ile polokalame o Talomua a Itumalo ma le lagolago atu ua iai fai faatoaga ua manuia ai ile galuega fai faatasi mai lava i tausaga ua tuanai. ,
O le fesosoani a le malo, na la’u atu i Talomua ia e tolu ile faaiuga o le vaiaso, e aofia ai laau toto, ma mea faigaluega e faatino ai faatoaga.