E au le ina’ilau a tina, ose alagaupu ua saga faamaonia lona moni, ina ua fetaui fola i taunuuga o galuega ua lauiloa i Samoa, i taitaiga a tamaitai o loo taulamua i le faatonutonuina o aiga fuafuaina ma le soifua manuia o tina, SFHA Samoa Family Health Association, afioga a, Lealaiauloto Lia’i Mauai Iosefa Siitia, ma le afioga a Siliniu Lina Chang ole SVSG Samoa Victim Support Group ma lana polokame Nofotane.
Ole vaiaso nei, lea ua sainia ai se maliega e galulue faatasi ai, le SFHA ma le SVSG mo le saga faa’oaina o tina o Samoa.
Ole feagaiga ua mae’a saini ai nei e ia ta’ita’i tama’itai, e mo le saga siitia ai o le Nofotane Samoa Social Enterprise NSSE Project i lesi tolu tausaga oi luma.
Ma faatupe e le Iuni o Europa, lea faamoemoe ia faaauau ai pea ona faia galuega e aloaia ai tina ma tamaita’i, aemaise le itupa o Nofotane o loo tau atina’e , sauaina i lagona, mafaufau, tino, gagana ae o tusitusiga ma faasalalauga.
Ile faamatalaga faalauaitele mai le SVSG, o faailoa mai ai, le autu ole NSSE Project, e lagolago le faasee atu ole Nofotane Program e avea ma Pisinisi, e le gata ina maua ai galuega, aoaoga, ae o avanoa faigaluega mo Nofotane e aofia ai ma tina e iai aafiaga tumau.
Ole SFHA o lo o taulamua, i le aia tatau a le tina i ona soifua fananafanau, SRHR Sexual reproductive health rights i Samoa, ua avea ai ose paaga agavaa, e ausia ai le faamoemoe o le NSSE, aemaise o itu tau soifua maloloina o le Nofotane.
Ose itu na saunoa ai le le afioga a Lealaiauloto, e faafetaia ile SVSG i le galuega faifaatasi, ia faia aoaoga mo le soifua manuia o nofotane, e mama ai se avega ma faaauau ai lava ona au le ina’ilau a tina.
