E le’o finagalo le ofisa sili o le Matagaluega o aoga taaloga ma aganuu, le afioga ia Aeau Christopher Hazelman e malolo atu ma faiaoga ile tasi le vaiaso lea ua faaauau atu ai le tuuaga a fanau ona o le faamai.
E leo finagalo foi le afioga Aeau e tuufau ma fanau pe malolo ma le faagasologa o aoaoga a fanau aoga e tusa ma silapsi o mataupu taitasi sa fuafua e tatau ona aoaoina ile vaiaso fou pea toe foi atu fanau mai le tuuaga.
Ma afua ai ona faamalosia mai e le Ofisa Sili le toe faia o le galuega fai faatasi a Matua ma le pitolaau a faiaoga lea na faia ile tausaga ua mavae ina ua tapunia aoga ona o le koviti 19.
O le galulue lea o faiaoga e faia meaaoga e fanau ae agai atu matua e pikiina mai i faleaoga, ma toe momoli pea maea ona galue ina e fanau galuega sa tuuina atu.
Saunoa Aeau, i le feiloaiga ma tusitala o le taimi tonu lea ua tatau ona tulai mai ai Matua e fesoasoani mai i le galuega a faiaoga ae sili ai ona tulai mai faiaoga e faatino lo latou valaauina.
Na ia saunoa foi e le tatau ona toe tulai mai le faafitauli lea na tupu mai i le taimi o sa ma vavao o le koviti ile fitu vaiaso lea na malolo ai, lea na ia maua ai faiaoga o nisi o aoga sa malolo foi e aunoa ma se galuega ae sa maua lava a latou pay.
Ma ua aapa foi le Ofisa sili ile au faigaluega a le Atua oloo faa fale lemalu i soo se afioaga ina ia tulei mai fanau e faia meaaoga i tua i aiga.
