O le lava o meaai mo le tausiaina ma le faafaileleina o faasao e pei o tilapia o le isi anavatau poo taulaiga mamao a le Matagaluega o Faatoaga ma Faiga faiva, pei ona maitauina i le vaiaso nei, le taunuu mai ai lea o le isi container lona 2 mo le aufaifaatoaga tilapia i Upolu nei ae o loo faamoemoe mo le motu tele i Salafai ile vaiaso fou.
I le saunoaga faapitoa a le sui Minisita o le Matagaluega le afioga ia Fuimaono Maiava Tito Asafo na ia faailo mai ai “Ole container muamua sa auina mai lea ma tufatufaina ile tausaga talu ai, ia Fepuari 2023 e tusa ma le 350 taga ile mamafa e 25kg,”
Peitai o le container lona 2 lenei o le aofaiga o taga meaai a tilapia e “655 taga – 25kg ile taga e tasi.
O le naunautaiga a le Matagaluega o faiga faiva, ia mafai ona siitia le atinae tilapia i totonu o Samoa mo le fofoga taumafa aemaise ia ausia tulaga e mafai ona gafataulimaina ai maketi e le gata i totonu o Samoa ae faapea mo le auina atu i fafo.
I faamaumauga a le Matagaluega ua sili atu ma le 50 fai faatoaga tilapia i totonu o Samoa lava ia.
Na ave le faafetai a le Matagaluega ma le au fai faatoaga tilapia i le malo o Ausetalia mo le tatou Poloketi lenei o le PIRAS e tusa ai o lenei fesoasoani mo le Malo aemaise o le aufaifaatoaga Tilapia.
