O le puipuia mai o Alo ma Fanau o Samoa mai le faatasina atu ma a’afia le mu’amu’a o le ola tuputupu ae i faamatalaga, ma ata le talafegai oloo i luga o Upega Tafailagi, o le itu lea oloo ave iai le fa’amamafa ma le fa’amuamua a le Polokalame o le Cyber Smart Samoa, ma le Matagaluega o Fesootaiga ma Auala Televavave.
O se taimi muamua lea ua faatino ai lenei Polokalame e le Matagaluega o Fesootaiga ma Auala Televavave, lagolago ina ele [DFAT] Department of Foreign Affairs and Trade Australia,[MFAT] Ministry of Foreign Affairs and Trade New Zealand, [GFCS] Global Forum of Cyber Expertise ma le [SITA] Samoa Information Technology Society.
I le saunoaga autu a le Minisita o le Matagaluega o Fesootaiga ma Auala Televavave le Afioga ia, Toelupe Poumulinuku Onesome.
O le polokalame Cyber Crime Samoa, oloo fa’amamafa mai ai le faataua o auala faaoga e a’oa’o ai tupulaga lalovaoa o Samoa mai le aafia i faamatalaga le talafeagai luga o upega tafailagi.
Saunoa le Minisita: “E faafetai ma fafeiloai ile Matagaluega a le GFCS mai Ausetalia ile auai mai i lenei Polokalame ia mautinoa oloo saogalemu ma puipuia Samoa, le Pasefika ma le lalolagi atoa.
“Ua faagasolo le polokalame , le Cyber Samoa Samoa Week, mo le vaiaso atoa lenei, ona o lona taua mo nei ma taeao. E matuai manaomia lava le mautinoa ua puipuia i tatou, e le gata o faamatalaga e patino iai tatou lava, o meatotino, o tatou tagata, puipuia o tatou fanau o le lumanai lea, ae o tatou lava laueleele ma o tatou gafa,”.
I se faatalatalanoaga ma le Faamasino Sili le Afioga ia, Vui Clarence Nelson, sa fai ma sui o le au valaaulia, na ia faafetai ai ile Minisita mo le avanoa e avane ai se sao o le Famasinoga, “ona e tatau ona malamalama ma fa’aetete fanau laiti i le faaogaina o le Initaneti.
“O le fautuaga faapitoa lea na ave i le Maatagaluega oloo iai nai Feagaiga faavaa-ole-Malo, mo International Convention e aafia ai Tulafono i tulaga i internet, e lei sainia e Samoa.
O lea la ua fautua ma faataatia i le Minisita e silasila iai le Malo ua tatau ona faia le vaega lea, e lua vaega e aoga ai.
“Muamua: o le sainia o feagaiga ia e tele ai fesoasoani tau tupe ma technical assistance e maua mai i Europa ona o feagaiga nei.
“Lua: e tele ai foi auala e mafai ona faamalamala mai ai metotia i tulaga tau tulafono e le nao le Solitulafono, ae mo auala e mafai ona puipuia ai tagata lautele, aemaise o fanau iti mai Soligatulafono oloo ua taatele i totonu o Samoa lenei Vaitau.
Ae ise faatalatalanoaga ma le Pule Sili o le Matagaluega o Fesotaiga ma Auala Televavave le Afioga ia, Lefaoalii Unutoa Auelua-Fonoti.
Ae ise faatalatalanoaga ma le Pule Sili o le Matagaluega o Fesotaiga ma Auala Televavave le Afioga ia, Lefaoalii Unutoa Auelua-Fonoti.
“O le taumafaiga lava a le matou Matagaluega e puipui le tatou Atunuu mai faaletonu i luga o Upega tafailagi, ma le fa’aaoga faaletatau ina, aemaise o tatou fanau mai le tuuina atu o ata i luga o Upega Tafailagi, o le matou tiute lena, o le a’oa’oina ma le logo ina o tatou tagata ina ia iloa ma silafia auala e puipuia mai le a’afia i luga o Auala televavave.
“E taua le puipuia o tatou faamatalaga poo information, ina ia mautinoa oloo saogalemu le tatou Atunuu, aemaise lava tatou fanau, pei o le auga lea ma le faamoemoe.
“Ua leva ona tatou faaogaina le Socia Media ao lea faatoa faia lea o se tatou polokalame, o lona uiga e taua le tatou galulue faatasi ina ia ta’u atu i tagata uma auala e puipuia mai le aafia luga o Upega tafailagi,”.
Na ta’ua e le Pule Sili, “o lenei Polokalame o le ‘a faatino i le Vaiaso atoa lenei, ae ua iai le faamoemoe e agai atu i tua i ao’ga, Afioaga ma Ekalesia, pea ma’ea a’oa’oga poo training mo le vaiaso e tasi. Talu e taua le nofo silafia o itu uma e lua.
O lo o fautua ma talosaga mai le Matagaluega o Fesootaiga ma Auala Televavave i le atunuu e galulue faatasi e logo ma ta’u atu i tagata uma o Samoa lenei feau taua mo le nonofo Saogalemu.
