Ua ioeina e Seira Malifa, 38, o Nuu-fou ma Safotu, lea sa avea ma tagata faigaluega o le faletupe o le ANZ moliaga e 330 ae teena moiliaga e 25 i luma Justice Fepuleai Ameperosa Roma o le Fa’amasinoga Maualuga i le amataga o le vaiaso nei.
Ae o loo tumau lava moliaga o le gaoi ao avea ma tagata faigaluega o le faletupe a le ANZ. O le faaletonu lea na tulai mai le faaiuga o le tausaga ua mavae, ina ua masalomia e le faletupe o le ANZ le toesea ai o tupe mai le faletupe.
I suesuega a leoleo na faamaonia mai ai e le sui komesina le afioga ia Papalii Monalisa Tiai-Keti, ile feiloaiga ma tusitala ile tausga ua mavae, e tusa ma le $80 afe le tupe na ave faagaoi e le ua molia.
Ina ua toe tulai le o lo tuuaia i luma o le Alii Fa’amasino ia Fepulea’i Ameperosa Roma i le taeao o le Aso Gafua o le masina o Me o le tausaga nei, sa fofogaina ai e le Loia Sili Lagolago le aofai o moliaga e 323 ma le tino i tupe e lata i le $1.5 miliona tala.
O loo tuuaia lē ua molia e faapea o le tausaga 2018 na amata ai ona faatino nei faiga faa’solitulafono, seia o’o mai i le 2022.
E lima tausaga ae fa’atoa iloa ai e le ANZ Bank o loo faia e lenei tamaitai ni faiga faasolitulafono ao avea ma tagata faigaluega. O le 2022 na lipotia ai e le faletupe i le Matagaluega o Leoleo ma faasolo ai loa suesuega.
Ae i faamaumauga a le ofisa o faamsinoga, na faia e lenei tamaitai se nonoga tupe i auala pepelo ma faamaumauga sese, mulimuli ane na ia tala le nonoga tupe ma faaoga.
Peitai ua tuuatu ai ile aso 5 o le masina o Fepuari o le tausaga fou e iloilo ai moliaga e 25 o loo ia teena.
