A’o tutu faatasi ai Samoa mo le 16 aso o galuega faatino e tetee atu ai i sauaga faasaga i tina ma fanau. Ae ua molimauina mai e le faamasinoga i Mulinuu, e le na’o tama o loo sauaina tina ma fanau.
E le’o faatagaina e le Afioga i le Faamasino i le Faamasinoga Maualuga Justice Clarke ona faailoa igoa ma vaega e iloagofie ai le Mafine 23 tausaga le matua na ia faia se faapaaga ma se teineititi 11 tausaga le matua mo le umi e 6 masina.
Ole taimi na iloa ai lea soligatulafono ua 12 tausaga o le teineititi, ina ua maua e matua o le teneititi ni feau tusitusia i luga o le telefoni, ma faamasino ai e ona matua.
Ua faamaonia e le Faamasinoga moliaga faasolitulafono e fitu ole mafine, e sootaga i feusuaiga ma le teine 12 tausaga.
Ma ua faasala ai nei ile fa tausaga ma le ono masina i le falepuipui i Tamumalala. Ole mataupu lea na ioe iai le mafine ua molia, na amata ile masina o Novema o le 2021 ma e faa ono ona tupu mulimuli ane.
Na iloa loa e matua mai feau i luga o le telefoni, ma fesiligia le la tama ma ia ta’u ai e moni o loo fai le la faapaaga ma le ma lesi mafine.
I faamaumauga na ta’u foi e le mafine le la faapaaga o loo faia ma o le sootaga lea na amata atu lava e le teneititi lea ua 12 nei ona tausaga.
Peita’i o faamaumauga atu i le ofisa o le Loia Sili, o atagia ai ua le mautonu le teine ua aafia ile faaletonu na tupu.
Mai le faamasino: “Talu na amata mai faatoa 11 tausaga o le teine, e le’i ono fai paaga ae ua faaaoga e le mafine lea ma sauaina i aga faafeusuaiga mo ni masina.
“O se tulaga sa leai se mautonu o le teineititi, ose sauaga o feusuaiga lea na faia, ma ua solia foi e le mafine lea na faamoemoega na ave iai e matua e latalata atu ai ile latou aiga, ma faataga i le latou siosiomaga. O fanau ose oloa taua a soo se matua ma aiga “
Ae o saunoa foi le Minisita o le Matagaluea o Tina ma Tamaitai, Leota Laki Sio ile sauniga o le Savali uliuli ole Aso Gafua, ole taua faasaga i sauaga o tina ma fanau: “O le suesuega o le “Soagalemu o Aiga” 2000 sa faamauina ai 46% le aofai o tina na sauaina e o latou taitoalua I le taimi atoa o le mafutaga faaleulugalii. Na toe faia lenei suesuega ile 2017 ma faamauina ai ua 60% le aofai o tina na sauaina e o latou taitoalua I le taimi atoa o le mafutaga faaleulugalii.
O lona uiga, e 14% na siitia ai lea fainumela I totonu ole 17 tausaga ma ose siitaga ua maoa’e. Sa faamauina ai foi ile suesuega lea ile 2017 le tusa male 90% ole fanau na sauaina. O lona uiga afai e to’a 3 pe to’a 5 se fanau iti ile aiga e aafia uma lava latou I taimi uma e faatino ai lenei aga le alofa I totonu o lea aiga. E foliga maia toe fai se isi suesuega e ono toe faailoa mai ai e faaauau pea le alu I luga o nei fainumela.”
Peita’i o le soligatulafono pei ona agia i le faamasinoga, lea na saunoa ai le afioga i le Faamasino: “O le faia o ia soligatulafono. mo se taimi ua faitau masina o tupu , ua le tusa ai ma le alolofa , ole aiga na avatu i lea mafine. Ma ua faamaonia ai moliaga uma e fitu faasaga iate ia, ua faasala i le fa tausaga ma le ono masina i le falepuipui .
