E le na o le tama ma le teine ta’alo lelei e mafai ona faamanuiaina ai, ua sili atu foi le manuia ua maua i le galuega faa laufali.
“E faamata e faigofie ma vaai maualalo ai le toatele i lenei galuega o le laufali, ae o le onosai lava ma le lotmaualalo e faaeaina lava,”
O se laasaga maualuga o le soifuaga faa-laufali lea ua faamauina, ua mafai ona ausia e susuga ia Joe Ainu’u Pule, Fale Savelio, ma Peter Ioane Olomauga.
I le maea ai o nisi o taamilosaga o taaloga soka sa faatautaia i Atunuu e i fafo atu o Samoa ma le Pasefika ua mafai ona o latou faafoeina, e pei o taamilosaga a le OFC U19 a le itupa o alii sa faia i Vanuatu ma Tonga lea faatoa maea atu nei, ma nisi o taaloga.
Molimau mai le susuga ia Peter i le faatalanoaga ma le vaega o faasalalau a le Asosi Soka a Samoa, sa matuai le faigofie le sailiga o sona avanoa ia sao ai i totonu o le aiga laufali, ina ua ia filifli e tuua le isi ana taleni o le lakapi ae finau loa e auai i totonu o le Soka.
Peitai na faatolu ona ia taumafai mo sona avanoa ae lei manuia, ae sa ia finau lava aua o lona na ia manaoga ma lona faanaunauga e fia avea ma laufali e ui o ia o se tama taalo.
O se fiafiaaga ia te ia le maua o le avanoa ile tausaga e 2020, ma ua savali ai nei le 4 o tausaga talu ona tau lau o lona faamoemoe, ua mafai ona ia faafoeina le tele o taaloga, ua iai taamilosaga Soka ile Pasefika ua mafai ona Malaga ma faatino, e aofia ai ma Niusila.
O le talaaga ma le savaliga foi lena a le susuga Joe Ainuu Pule ua atoa foi le 4 tausaga o avea ma laufali i lea foi faagatama o le soka, e ui e lei ausia nisi o laasaga maualuluga atu o le galuega faa laufali, ae e iai le talitonuga e iai le aso ma le taimi ua atofa e le Atua e taunuu ai ma ausia na laasaga maualuluga.
O Joe na mafai ona ia faafoeina ma laufali i se tasi o taaloga faavaomalo i le tausaga ua mavae e 2023, ma o se tasi na o mitamita ia te ia.
E aofia ai le susuga ia Fale Savelio o le taimi muamua ia te ia talu ona auai i le aiga laufali, i le taamilosaga sa faia i Tonga, ma ia faailoa ai le ese foi o lagona na ia faalogoina ina ua mafai ona ausia lea foi tulaga o le galuega.
Faailoa e nei alii o se fiafiaaga ia tei latou ae o latou aiga o loo lagolago malosi e aofia ai ma le susuga ia Maria Akenese Salamasina ma le susuga ia Malae o loo faatautaia toleniga i aso taitasi le silasila atu ma matau atu le tolaulauina mai o latou suafa ma le igoa o le atunuu o Samoa i taimi o taamilosaga ua atofa e latou te faafoeina.
E tasi lava le faafitauli o le galuega o tagata lautele poo le au maimoa o au e lua o loo taaalo i taimi o taaloga, e faamatalaga e felafoai pe a le faamalieina i faaiuga ua o latou faia, ma tuumaualaloina ai so latou taumafai e ui ua iai le agavaa ma le tomai faa laufali ua faauuina ma faamanuiaina ai i latou.
Peitai i le taimi lava e tasi o loo aoaoina mai ai foi se lesona taua, o le le faalogologo tala ma tauemuga e lafo mai, ae ia faatino ma le faamaoni le faaiuga sao ma le tonu e tatau ai, e ui ua pa’i nisi o le aumaimoa ma faaoolima iai latou, ae o le mea taua ia faatino le galuega ma le faamaoni.
Tusia/ Ata pueina: Irae Laasaga
Ata: Joe Ainu’ū Pule, Fale Savelio, Peter Ioane Olomauga
