Lagolago Don Bosco i toleniga a le Manu Samoa mo le ipu o le lalolagi e ala ile ofo atu o le fautasi e faia ai toleniga.
Ua avatu ai le lagolago ma le faamalosi au a le laumua o Don Bosco ile Manu Samoa ao lei malaga atu mo le taamilosaga ile ipu o le lalolagi o lenei foi tausaga.
Ina ua talia le talosaga a le Manu Samoa sa tauala mai ile Kaputeini o le fautasi a Don Bosco le afioga ia Vaimasenuu Zita Matel e fia iloa ma fia aoaoina maia tomai ma aitia o loo ia faaogaina e taitai ai le auvaa a le laumua.
Ma atofa ai loa e le alii pule o le laumua le afioga ia Fonomaitu Mane Su’a le aso e faaavanoa uma ai alo ma fanau o le aoga e malolo mai aoaoga ae lagolagosua faatasi lenei faamoemoe pei ona ia saunoa iai.
Na amata aloaia lea polokalame i le sauniga lotu na saunia lea e le susuga ile Patele na filifilia, ona sosoo lea ma faamanuiaga a le Kaputeini ina ua uma ane ona sii mai le vaa e faalatalata ile sami.
Na molimauina foi le ola ma matagofie o faafiafiaaga a le aoga na faatino, ile uma ane ona faia ai lea o se aoga faapitoa e Vaimasenuu e faamatala uma sa, o tulafono ae o aiaiga foi o le auvaa ma le o loo taitaia e sootaga uma ia tulafono ile moto tauave a le laumua o le “One Beat” Tatou folau faatasi.
Peitai saunoa le susuga ia Fonomaitu o se taimi muamua lea ua faia ai lenei faamoemoe taua, aua e le gata ua amanaia e le Manu Samoa le laumua ma lana fautasi, ae o se sao foi lea a le Don Bosco mo tama fanau o lea ave fu’a ile sailiga o le ipu o le lalolagi.
O le fautasi lea a le Don Bosco sa tu lua ile tuuga fautasi a le atunuu i le tapunia aloaia o lona 60 tausaga o le tu toatasi.
Ma na ave ai le faafetai a le alii pule ma le mamalu o le aiga faiaoga ile Manu Samoa ma le latou pulega ile amanaia ina o le laumua ma lana fautasi e ui e lei faamanuia ina ile tuuga ua mavae.
E lata ile 400 alo ma fanau o loo aotauina ile laumua o Don Bosco ma o loo galulue ai le aufaigaluega e toa 35 ile taimi nei.
