Ua mautu nei ma mausali le kamupani latou te faaninii ma faata’ape’apeina ni pepa o faamatalaga (Private information) a se Matagaluega poo se ofisa e le’o manana’o e liki i tua pe faitau e nisi, le U.P Group i Vaitele.
Sa faavaeina lenei kamupani i totonu o Samoa i le tausaga e 2022, ma o le kamupani muamua foi lenei i totonu o Samoa latou te faatinoina lenei ituaiga galuega i totonu o Samoa.
I le tatou oo atu ai ma molimauina lona ofisa autu i Vaitele, ua silia male 30 kalone lapisi ua faamau ma o latou loka faapitoa mo le tuuina atu lea i se Matagaluega poo le faalapotopotoga o loo fia tuuina mai ni pepa o faamatalaga faapitoa poo private information mo le vili ina.
Ua mautu foi ma le masini ua tuuina i le potu faapitoa e faatino ai e le sikulati le galuega o le la’uina o pepa i totonu o le masini mo le faaninii ina.
O le latou lava na auaunaga o le kiliva i tua o le kalone mo le tuuina ai o pepa o faamatalaga a le ofisa, toe ao mai pea ua maea, faatino le galuega o le faaniniiina o pepa, ma toe sauni e tia’i pepa ua maea ona faaleagaina.
Peitai na tatou fesiligia le pule o lenei kamupani le susuga ia Li’omatua Matale Mailata Fuipu’a Mariner ma lona faletua ia Toesulusulu Faaiuga Mariner, i le saogalemu o faamatalaga nei mai le aufaigaluega o loo faatinoina le galuega.
Peitai na faamatala auiliili mai e lenei tamalii, ua maea ona fai suesuega ma aoaoga faapitoa a le sikulaki ua nafa nei ma le galuega i le matagaluega o leoleo.
Ma e na o le pau lea o le tagata o le au faigaluega ua maea ona toleni i le faia o le galuega, e na o ia foi o loo iloa numera o loo lokaina ai gutu o pin o loo faaaogaina.
Ae afai ae tuuina atu ni faamatalaga a le Matagaluega ae leo talitonuina lava le auaunga e mafai ona faataga le tagata e toatasi mai le Matagaluega e alu atu e molimauina le faaleagaina o na pepa ao faatino e le sikulaki le galuega.
Ma e silia ma le 5 camera o loo i totonu o lena potu, e mataitu mai ai i le ofisa autu o loo i Niusila gaioiga uma o loo faatino e le tagata o loo faia le galuega i Samoa nei.
Na ta’ua e le alii pule o se pisinisi na faigata lava lona tau atiae ae o le taunuuga o lenei pisinisi ua manuia ma aoga mo le atunuu, aemaise lava i Matagaluega ma faletupe.
Ua maea foi ona o latou sauni e auina atu i tua le kalone lapisi lena mo le tuuina ai o faamatalaga a Matagaluega o loo fia faaleaagaina, ma e na o le toatasi foi le tagata mai se fale faigaluega e mafai ona faailoa ai le numera e loka ai le gutu o le na kalone lapisi.
Ma e silia ma le 30 kalone ua iai, e $350 ile vaiaso, ae e silia ma le 100 pepa e mafai ona faaleagaina i le taimi e tasi e le masini.
Saunoa Li’omatua e silia ma le $200, afe le tupe na faaaluina mo le fausia o lenei pisinisi.
Tasi lava le faafitauli o tagata o loo faaogaina le auaunaga, e mananao lava ia faataugofie le auaunaga ae le silasila i le aoga ma le taua o le galuega o loo faatino e le faigofie.
O le 2 ai nei o tausaga talu ona faavae le kamupani a le U.P Group i Samoa.
O lea le toe manaomia e Matagaluega ma Ofisa le agai e tiai i tafaigata ile lapisi a latou faamatalaga poo le susunu foi aua o lea ua o latou iloa le sefe o le taimi ma le saogalemu ina ua mautu le kamupani lenei i Vaitele.
