E le’i molia e leoleo le alii talavou 16 tausaga i lona tuleia o le kololi ae tietie ai sona tei i luga ma faalealea le fu’a a Samoa.
“E leai e le’i molia e leoleo ile mea lena.” pei ona saunoa le Sui Komesina o Leoleo ma Falepuipui, Afioga Leiataua Samuelu Afamasaga, ina ua tatou fesiligia.
O le vaaiga lea pei ona molimauina iluga o fesootaiga televave ua salalau ai, o aga poo sasa ole tapuaiga o taaloga lakapi, o loo auai atu iai le Manu Samoa, ma le Toa Samoa i le faaiuga ole vaiaso na te’a nei.
Na tatou fesiligia le afioga ile Sui Komesina o le Matagluega o Leoleo ma Falepuipui, Peita’i na saunoa Lei’ataua e leai, e le’o molia e leoleo le atalii lena o loo iai faasalalauga i luga o FB.
“Ae e ese le mafuaaga na pu’e ai e leoleo . O le alii tonu lava lena o loo iai le tusi saisai poo lona outstanding warrant of arrest.”
I le tatou faatalanoaga lava lea ma le afioga ile Sui Komesina ile taeao nei, na ia faamautu mai ai, o le atalii tonu lava lena lea o loo iai le tusi saisai ona ose soligatulafono o loo tuua’ia ai. Ma na faamautu atu foi e leoleo o le tagata tonu lava lena na sailia e leoleo.
Ae o isi auililiga o lena mataupu o le’a talanoa iai ile feiloaiga ma Tusitala i le aso.
Peita’i o solitulafono o le faamalomaloa i le tuga o le po ole Aso Sa na te’a nei ile manumalo a le Toa Samoa ia Toga, e leai se tagi o lena mataupu ua oo atu i leoleo.
Talu o aiga na aafia matua tausi ma fanau pepe ile moe te’ite’i ma faigata ona toe momoe i le malomaloa o le feei o tapuaiga, ae na te’a uma na ita ina ua manumalo le Toa Samoa ia Toga i lena vaveao, pei ona saunoa le tama ia Iuni Mauga o Faleata.
